Чингэлтэй дүүргийн нэгдүгээр хорооны нэг, гурав, 12, 13, 14, 26 дугаар байрны гадаах талбайд ухаалаг хогийн сав анх удаа байршуулжээ. Энэхүү хогийн сав нь өнгө үзэмж сайтай, хэрэглэхэд хялбар, удаан хугацаанд ашиглах боломжтойгоороо онцлогтой. Үүнийг энгийн хогийн сав шиг бага зайд суурилуулдаг бөгөөд багтаамж багатай мэт харагддаг аж. Гэхдээ газар доорх чингэлэг рүү хогоо шилжүүлдэг тул багтаамж нь их гэнэ. Чингэлгийн температурыг тогтвортой байлгаснаар ялзралыг удаашруулж, үнэр нь гадагшлахаас сэргийлдэг юм байна. Ийм ухаалаг савыг байршуулснаар ил задгай хог хуримтлагдахгүй болж, байгаль орчинд үзүүлэх сөрөг нөлөөллийг бууруулах давуу талтай аж.
Ухаалаг хогийн сав нь дүүргэлтийн түвшний хяналтын системтэй учир хог ачилтын үйлчилгээний байгууллагуудад мэдээлэл нь тогтмол хүрнэ. Үүний дагуу хог дүүрсэн даруйд тээвэрлэх юм байна. Оршин суугчид чип ашиглаж, хаягдлаа саванд хийх гэнэ. Цаашид ийм савыг Чингэлтэй дүүргийн бусад хороонд байршуулахаар төлөвлөжээ.
Бэлтгэсэн А.Үүлээ
