Өнөөдөр гадаа 21 градусын дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
Зургадугаар сарын 20-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 172 дэх өдөр бөгөөд он дуусахад 194 хоног үлдлээ.
- Цаг агаар өдөртөө 21 хэмийн дулаан бол шөнөдөө 6 градус дулаан байх нь ээ.
- Билгийн тооллын давхарласан 13, Бархасбадь гараг. Oнгоц одтой, хөхөгчин туулай өдөр. Өдрийн наран мандах, жаргах цаг нь 4:53-20:55. Тухайн өдөр гахай жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр хууль цааз гаргах, батлах, хэрэглэх, хулгай дээрмийг номхотгох, гэмтнийг шийтгэх, мал адгуус номхруулах, угаал үйлдэх, мал аж ахуйн үйл, удирдлагын суудалд суух, огторгуйн үүдийг боох, их хүмүүнтэй уулзахад сайн. Газар хагалах, ус булгийн эх малтах, балгадын суурь тавих, нохой худалдан авахад муу. Өдрийн сайн цаг нь хулгана, бар, туулай, морь, хонь, тахиа болой. Хол газар яваар одогсод зүүн хойш мөрөө гаргавал зохистой. Үс шинээр үргээлгэх буюу засуулбал жаргал ирнэ.
- Валют арилжааны төвд ам.долларын авах ханш 3360.00 төгрөг, зарах нь 3387.00 төгрөг байна. Харин рублийн авах ханш 38.20, зарах ханш 38.80, юанийн авах ханш 463.00, зарах ханш 468.80, вонийн авах ханш 2.26, зарах ханш 2.49 төгрөг байна.
Өнөөдөр болох онцлох үйл явдлууд:
- 09:00 цагт: ГХЯ-нд: “Монгол-Туркийн орчин үеийн харилцаа, цаашдын чиг хандлага” эрдэм шинжилгээний хурал болно.
- 11:00 цагт: Нээлттэй Нийгэм форумд: УИХ-ын сонгуулийн үйл явцын ажиглалт, мониторингоор хэвлэлийн хурал зарлажээ.
- Гадаадад суугаа Монгол Улсын иргэдийн УИХ-ын сонгуулийн саналыг өнөөдрөөс эхлэн Дипломат төлөөлөгчийн газарт авч эхэлнэ
- 11.00 цагт “Монгол Ньюс” мэдээллийн төвд: “Лам хүүхдүүдийн” гэх хэрэгт холбогдогчийн ар гэрийнхэн нөхцөл байдлын талаар “Монгол Ньюс” мэдээллийн төвд мэдээлэл хийнэ.
- 11:30 цагт: “Улс төрийн намын харьяалалгүй иргэдийн холбоо” ТББ-аас сонгуулиа шударгаар явуулахыг уриалж байр сууриа илэрхийлнэ.
- 15:00 цагт: МҮХАҮТ-д: Евразийн эдийн засгийн холбооны гаалийн зохицуулалт, гарал үүслйн дүрэм, бусад асуудлаар цахим сургалт уулзалт болно. ЕАЭЗХ-той Чөлөөт худалдааны хэлэлцээр байгуулах ажлын хүрээнд санал солилцоно. Утас: 9191-9396.
- 15:00 цагт: Уран зургийн галерейд: МУБИС-ийн Дүрслэх урлаг, Технологийн сургуулийн болон БНСУ-ын КЁНГГИ их сургуулийн уран бүтээлч багш нарын хамтарсан “KOREAN ROUTE” уран бүтээлийн үзэсгэлэн нээгдэнэ. Үзэсгэлэн зургадугаар сарын 20-24-нд гана.
Энэ өдөр дэлхийн түүхэнд:
- 451: Ромын эзэнт гүрэн Хүн нарын их хаан Атиллын эсрэг шийдвэрлэх томоохон тулааныг хийжээ. Энэхүү тулааныг түүхэнд Чалонс талын тулаан хэмээн тэмдэглэн үлдээжээ.
- 1840: Зохион бүтээгч Самуэль Морз өөрийн нээлт болох телеграфын патентаа авч байжээ.
- 1877: Александр Грэхэм Белл Дэлхийн анхны телефон утасны үйлчилгээг Канадын Онтарио хотноо нээжээ
- 1900: Оросын ШУ-ы академийн “Оросын туйлын экспедиц” Санкт-Петурбург хотоос “Заря” хэмээх уурын хөдөлгүүрт дарвуулт хөлгөөр аяллын гараагаа эхлүүлэв. Экспедиц алдарт Санниковын газрыг хайх зорилготой байсан гэдэг.
- 1944: Герман улс туршилтын V-2 загварын пуужинг амжилттай хөөргөжээ. Пуужин 176 км өндөрт хүрсэн явдал нь хүн төрөлхтний түүхэн дэх хүний гараар хийсэн бүтээл гадаад сансарт хүрсэн анхны тохиолдол байв.
- 1990: Ангараг гаргийн тойрог замд орших бага гараг Эврикаг нээв.
- 1992: Тува улсад ОХУ-аас тусгаар тогтнох тухай бүх нийтийн санал асуулга явуулах талаар иргэдийн гарын үсэг цуглуулж эхэлсэн.
