Олон улсын хүүхдийн эрхийг хамгаалах өдрийг тохиолдуулсан, цагдаа, дотоодын цэргийн байгууллагын үйл ажиллагааг сурталчлах зорилготой “Хүүхэд таныг хамгаалъя” нээлттэй өдөрлөг өчигдөр боллоо. Гурав дахь жилдээ зохион байгуулж буй эл өдөрлөгийн хүрээнд цагдаагийн байгууллагын үйл ажиллагааг хүүхэд багачуудад сурталчлан таниулахаас гадна нохойтой албан хаагчдын үзүүлбэр, гардан тулаан, автомашины үзэсгэлэнг сонирхуулав. Түүнчлэн урлаг, спортын олон төрлийн арга хэмжээ зохион байгуулжээ. Тухайлбал, сагсан бөмбөгийн 3х3 төрлийн, хийн буу, дартс, АХА зэрэг тэмцээн, уралдаан болсон аж. Мөн өдөрлөгийг зорин ирсэн хүүхэд багачууд төдийгүй гэр бүлийнхэнд нь хэрэгцээтэй сургалт, зөвлөгөө өгснөөрөө онцлогтой байв. Жолоодох эрхийн лавлагаа авах болон эрхээ хасуулсан иргэдэд сургалт явуулах зэрэг үйлчилгээг холбогдох байгууллагынхан энэ үеэр үзүүлжээ. Үүнээс гадна жолоодох эрхийн үнэмлэх олгох, хүчинтэй хугацааг сунгуулах, галт зэвсэг, хувийн хамгаалалт, аюултай ачаа, тээш зөөвөрлөх зөвшөөрлийг хэрхэн авах талаарх мэдээллийг олон нийтэд өгсөн юм.
Бэлтгэсэн У.Сүрэн
