Нийслэлийн Хөрөнгө оруулалтын газраас “Ubinvest” аппликэйшн ашиглалтад оруулснаа өчигдөр мэдээлэв. Улаанбаатар хотод хийж байгаа бүтээн байгуулалт, ялангуяа иргэдийн өдөр тутмын амьдралд чухал нөлөөтэй зам, нийтийн эзэмшлийн талбайн тохижилт зэрэгтэй холбоотой мэдээллийг эл аппликэйшнээс авах боломжтойгоороо онцлог юм байна. Тодруулбал, иргэд өөрийн харьяа дүүрэг, хороо, хороолол, хотхоны ойр орчим дахь нийтийн эзэмшлийн гудамж, талбайд хийж буй барилга угсралт, тохижилтын ажлын талаар мэдээлэл авч болох нь. Мөн амьдардаг газрынхаа ойр орчмын инженерийн шугам сүлжээ, барилга, байгууламжийн хэсэгчилсэн болон их засварын ажлын явцтай танилцах боломжтой гэнэ. Гэхдээ зөвхөн улс, нийслэл, орон нутаг, гадаадын төсөл, хөтөлбөр, дүүргийн төсвийн хөрөнгөөр хэрэгжүүлж буй бүтээн байгуулалтын ажлыг дээрх аппликэйшний мэдээллийн санд багтаасан юм байна.
