Үндэсний цэцэрлэгт хүрээлэнд буй экстрим талбай хүүхэд, залуучуудын хүсэмжит газар болоод байна. Урин дулааны улирал эхэлсэнтэй холбогдуулан бага насны хүүхдүүд уг талбайд ирж дугуй, ролик, скүүтер унах нь элбэг аж. Эл талбайд “Roller skates Ulaanbaatar” компанийнхан дөрвөн дугуйт тэшүүр түрээслэх үйлчилгээ эрхэлдэг юм байна. Тэшүүрийг түрээслэхэд нэг цагийн 8000 төгрөг төлөх гэнэ. Харин өөрөө тэшүүрээ авчирвал 4000 төгрөгөөр гулгах боломжтой. Тус компани нь тэшүүр түрээсэлж буй хүмүүст зориулан хамгаалалтын хувцас, хэрэгслийг ч дагалдуулж өгдөг байна. Ингэснээр бага насны хүүхдүүд унаж, бэртэхээс урьдчилан сэргийлэх зорилготой аж.
Ташрамд дурдахад, Үндэсний цэцэрлэгт хүрээлэн нь одоогоор чийрэгжүүлэх, спорт бэлтгэлийн, хүүхдийн тоглоомын, экстрим зэрэг талбайтай. Нийт 973 га газрыг хамардаг эл хүрээлэн Азидаа зургаадугаар байрт эрэмбэлэгддэг аж. Нийслэлийн ногоон байгууламжийн 23 хувийг дангаараа бүрдүүлдгээс гадна иргэд чөлөөт цагаа ая тухтай өнгөрүүлэх боломжтой цор ганц цэцэрлэгт хүрээлэн юм.
Бэлтгэсэн У.Цэцэг
