Богд хааны ордон музейгээс сайн дурын ажилтны хөтөлбөр зарлажээ. Монгол Улсын түүх, өв уламжлалаа судлан мэдэж, соёлын өвийг хайрлан хамгаалах хүсэлтэй сайн дурын ажилтнуудыг уг хөтөлбөртөө хамруулах юм байна. Мөн музейд ажиллаж үзэн, орчин нөхцөл, уур амьсгалтай нь танилцах сонирхолтой залуусыг урьсан байна. “Манай сайн дурын ажилтны хөтөлбөрт хамрагдсанаар Монгол Улсын тусгай хамгаалалтын газар болох Богд хааны ордон музейтэй дотно танилцах боломжтой. Түүнчлэн эх орныхоо түүх соёлыг илүү бодитоор, түүхэн орчинд нь танин мэдэх бололцоог олгоно. Үүнээс гадна хосгүй нандин өвүүдийг хамгаалах, сурталчлан таниулахад гар биеэр оролцох болно” гэж тус музейгээс мэдээлэв. Хөтөлбөрт хамрагдахыг хүсвэл 11-342195, 99664034 дугаарын утсаар холбоо бариарай.
Бэлтгэсэн М.Оч
