БШУЯ, МУИС, төрийн өмчийн их дээд сургуулиудын дундын удирдах зөвлөл хамтран энэхүү олон улсын эрдэм шинжилгээний хурлыг зохион байгуулж байна. Хоёр өдөр үргэлжлэх “Шинжлэх ухаан технологийн сэргэлт: Их сургуулиудын оролцоо” сэдэвт олон улсын эрдэм шинжилгээний хурал нь их сургуулиудын судалгаа, инновацын өнөөгийн хүрсэн түвшинг олон нийтэд хүргэх, нийгэм, эдийн засгийн хөгжилд оруулах хувь нэмрийг нэмэгдүүлэх, төрөөс олгох судалгааны санхүүжилтийн талаар зөвлөмж боловсруулж, хүргүүлэх зорилготой юм.
Хуралд АНУ, Их Британи, Япон, Өмнөд Солонгос, Хятад, Герман зэрэг улсын 10 гаруй нэртэй эрдэмтэд, Монгол Улсын их сургуулиудын эрдэмтэн багш нар, залуу эрдэмтдийн төлөөлөл 200 орчим хүн оролцож байна. Боловсрол, шинжлэх ухааны сайд Л.Энх-Амгалан “1944 онд Монгол улсын их сургууль монголын анхны эрдэм шинжилгээний бага хурлыг зохион байгуулж байлаа. Анхны хурлаар биологи, анагаах ухаан, математик, хими, мал эмнэлгийн профессорууд илтгэл тавьж, хэлэлцүүлэг өрнүүлж байжээ. Энэ цаг үеэс хойш Монгол улсын эрдэм шинжилгээ, судалгааны үйл ажиллагаа тасралтгүй өргөжин хөгжиж ирлээ. Манай эрдэмтэн судлаачид өнөөдрийн байдлаар олон улсын эрдэм шинжилгээний бүтээлийн санд бүртгэлтэй 8000 гаруй бүтээл хэвлүүлсэн бөгөөд тэдгээрээс 90 мянга гаруй удаа эшлэгдсэн байна. Нийт бүтээлүүдийн 80 гаруй хувийг шинжлэх ухааны академи, төрийн өмчийн голлох их сургуулиудын эрдэмтэд хэвлүүлжээ. Эдгээр бүтээлийн 70 гаруй хувийг төрийн өмчийн таван их сургуулиудаас бүтээсэн нь шинжлэх ухаан, инновацын хөгжилд их сургуулиудын оролцоо өндөр буйг илтгэж байгаа юм” хэмээн нээлтийн үеэр онцоллоо.
Хурлын үеэр Засгийн газраас баталсан “Гадаадын болон дотоодын дээд боловсролын сургалтын байгууллагад суралцагчид тэтгэлэг, зээл олгох, эргэн төлүүлэх, буцалтгүй тусламж олгох, дэмжлэг үзүүлэх” журмын шаардлагыг бүрэн хангасан докторын сургалтын үндсэн цагийн хөтөлбөрт суралцах тэтгэлгийг анхны 16 докторантурт гардуулсан. “Шинжлэх ухаан технологийн сэргэлт: Их сургуулиудын оролцоо” сэдэвт олон улсын эрдэм шинжилгээний бага хуралд “Шинжлэх ухаан, технологийн, инновацын хөгжилд их сургуулийн оруулах хувь нэмэр”, “Аж үйлдвэрийн 4-р хувьсгал ба хиймэл оуюны эринийг их сургуулиуд хэрхэн даван туулж манлайлах вэ”, “Хиймэл оюун ба дээд боловсролын шинэчлэл” зэрэг илтгэлүүд тавигдаж, “Их сургууль-шинжлэх ухаан, технологийн хөгжлийн тэргүүн эгнээнд”, “Дэлхийн мэдлэгт хувь нэмэр оруулах залуу эрдэмтэд” сэдвээр хэлэлцүүлэг өрнөж байна.
