Тэнэгэр говийн тэнхээт хүлэг тэмээн сүргээ хамгаалах, өсгөн үржүүлэх, дэлхийд таниулах, алдаршуулах нөр их үйлсэд сэтгэл зүрхээ зориулдаг тэмээчид, уяачид, говь нутгийн зон олны бахархалт баяр болсон "ТҮМЭН ТЭМЭЭНИЙ БАЯР" 2024 оны хоёрдугаар сарын 1-3 хүртэл Өмнөговь аймгийн төв Даланзадгад хотноо болох гэж байна.
Өмнөговь аймаг нь Монгол Улсад төдийгүй дэлхийд алдартай Галбын улаан, Ханын хэцийн хүрэн үүлдрийн хоёр бөхт тэмээний өлгий нутаг юм.
Дэлхий дээрх нийт тэмээний 90 хувийг ганц бөхт, 10-хан хувийг хос бөхт тэмээ эзэлдэг.
Тэгвэл ховорт тооцогдох хос бөхт тэмээний цөм нь Монгол Улс, Монголын говь юм.
Дэлхийд ховордсон хоёр бөхт тэмээн сүргийг өсгөх, хамгаалах, уламжлалт тэмээн соёлыг дэлгэрүүлэх, тэмээчдийн хөдөлмөрийг үнэлэх, алдаршуулах ажлыг төр болон төрийн бус байгууллагууд зохион байгуулсаар ирсэн. Өмнөговь аймгийн "Түмэн тэмээ-Тэмээн аялал жуулчлалын холбоо" нь 1997 оноос эхлэн сумдад тэмээний баяр зохион байгуулж эхэлсэн нь, улам боловсронгуй болж, цар хүрээ нь өргөжсөөр өнөөдөр дэлхийд данстай аялал жуулчлалын томоохон эвент болж чаджээ.
Түмэн тэмээний баярыг гадаадын олон жуулчид зорин ирж үзэхээс гадна дэлхийн хэмжээний томоохон агентлагууд сурвалжилдаг болсон нь аялал жуулчлалын хөгжилд төдийгүй эх орноо дэлхийд таниулахад хувь нэмрээ оруулж байна.
Өмнөговьчууд 2016 онд "Монгол тэмээ-999" арга хэмжээг амжилттай зохион байгуулж, 1132 тэмээг 15 километр зайд уралдуулан, 1108 тэмээг барианд оруулснаар дэлхийн дээд амжилт тогтоон, Гиннесийн номонд бүртгүүлсэн том амжилтын эзэд билээ.
Тус үйл ажиллагааны дэлгэрэнгүй хөтөлбөрийг танилцуулж байна.
2023 оны хоёрдугаар сарын 1.
16:00 – 19:00 Зочид төлөөлөгчид, оролцогчдыг угтан авч байрлуулна.
16:00 – 19:00 Тэмээчдийн техникийн зөвлөгөөн.
2023 оны хоёрдугаар сарын 2.
09:00 – 13:00 “Түмэн тэмээний баяр – 2024” -ын тэмээн поло тэмцээний урьдчилсан тоглолтууд
09:00 – 18:00 Тэмээний сүү, сүүн бүтээгдэхүүний үзэсгэлэн
10:00 – 12:00 Тэмээтэй буухиа уралдаан /4500 метр/
14:00 – “Түмэн тэмээний баяр – 2024” -ын нээлтийн ажиллагаа /“Тэмээтэй парад жагсаал”-аар эхэлнэ. Тэмээний баярт ирсэн жуулчид, иргэд сайн дураараа тэмээтэй парад жагсаалд оролцох боломжтой/
14:00 – 15:00 “Тэмээтэй сайхан хос”-ыг шалгаруулна
14:00 – 16:00 Сайхан буур, сайхан ингэ шалгаруулна
16:00–17:00 “Тэмээн поло”-гийн аваргын цомын төлөөх тоглолт
16:00 – 17:00 Тайлаг тэмээний уралдаан
19:00 – 22:00 Тэмээний баярт зориулсан шоу арга хэмжээ /Гранд говь жуулчны бааз/
2023 оны хоёрдугаар сарын 3.
09:00 – 12:00 “Түмэн тэмээний баяр-2024” наадмын хурдан тэмээний уралдаан
– Атан тэмээний уралдаан
– Хоёр наст буюу Торомны уралдаан
– Хурд хүч, авхаалж самбаа шалгасан богино зайн уралдаан
09:00 – 14:00 Тэмээний сүү, сүүн бүтээгдэхүүний үзэсгэлэн
14:00 Тэмээчид, малчдын авхаалж самбааг сорьсон “Тэмээтэй буухиа тэмцээн”
16:00 Шагнал гардуулах, хаалтын ажиллагаа.
