Филиппин, Япон, Индонез улсад болж буй сагсан бөмбөгийн ДАШТ-ий хэсгийн тоглолтууд өндөрлөж, дараагийн шатанд шалгарах багуудын нэрс тодорсоор байна. Ингээд тэмцээний дөрөв дэх өдрийн зарим сонирхолтой тоглолтын мэдээллээс хүргэе.
Кабо-Верде-Венесуэл 81:75
Сагсан бөмбөгийн ДАШТ-ий түүхэн дэх хамгийн жижиг оролцогч улс болох Кабо-Верде анхны ялалтаа байгууллаа.
БНХАУ-Өмнөд Судан 69:89
Хэсгийн эхний тоглолтдоо Пуэрто-Рикогийн тамирчдад харамсалтай хожигдсон Африкийн баг энэ удаад БНХАУ-ыг бут ниргэсэн. Ингэснээр ДАШТ-ий түүхэн дэх анхны хожлоо байгуулав. NBA-ийн “G-League”-ийн “Чикаго”-дтоглодог К.Жонс багаа тэргүүлэн 21 оноо авсан байна.
Шинэ Зеланд-Йордан 95:87
Хоёр багийн тоглолтын төгсгөл онц сонирхолтой болсны эцэст цаг сунгав. Хэдий эл тулаанд Шинэ Зеландын баг ялсан ч Йорданы Р.Холлис-Жефферсон тоглолтын гол баатраар тодорсон юм. Тэрбээр тоглолтын үндсэн цаг дуусахаас 15 секундийн өмнө холын зайн шидэлтээ алдаатай оруулж, тоог тэнцүүлсэн. Үүнээс гадна 39 оноо авч энэ удаагийн ДАШТ-ий онооны дээд амжилтыг тогтоогоод байна. Сонирхолтой нь, домогт К.Брайанттай төстэй дүр төрхтэй түүнийг Манилагийн спортын ордонд цугласан үзэгчид “Коби, Коби” хэмээн уухайлан дэмжиж байлаа.
Гүрж-Словени67:88
Словенийн төдийгүй энэ удаагийн ДАШТ-ий хамгийн гол од болох Л.Дончич хоёр тоглолт дараалан гайхалтай статистик үзүүлэлтийн эзэн болов. Тэрбээр Венесуэлийн эсрэг 37 оноо авсан бол энэ удаад 34 оноогоор (10 самбар, зургаан оновчтой дамжуулалт) багтаа тус хүргэлээ.
Грек-АНУ 81:109
Америкийн баг хоёр дараалан хялбар ялалт байгуулснаар хэсгээсээ гарах болзлоо биелүүлэв. Эхний үеийн дараа тэд дөрвөн онооны илүүтэй байсан. Тэгвэл хоёрдугаар үеийн төгсгөлд 17, тоглолтын төгсгөлд 31 онооны илүүтэй болсон. Тоглолтын шилдгээр 15 оноо авсан АНУ-ын багийн О.Рийвз тодорчээ.
Бразил-Испани 78:96
Дэлхийн аварга цолоо хамгаалагч испаничууд Бразилын багийн эхний ялагдлыг хүлээлгэв. Ингэснээр тэд хасагдах шатны эрхээ халаасалсан юм. Эхний тоглолтод хүнд гэмтэл авч, маргааш нь мэс засалд орсон Бразилын багийн лидер Р.Нето байсан бол уг тоглолтын үр дүн өөрөөр эргэж болох байлаа.
Өнөөдөр болох тоглолтууд
- В хэсэг
Өмнөд Судан - Серби
БНХАУ - Пуэрто-Рико
- F хэсэг
Гүрж - Венесуэл
Словени- Кабо-Верде
- C хэсэг
АНУ - Йордан
Грек - Шинэ Зеланд
- G хэсэг
Кот д’Ивуар - Бразил
Иран - Испани
