Улаанбаатарт үргэлжлэн орсон борооны улмаас үерийн усанд автаж, нөхцөл байдал хүндэрсэн байршлууд дээр Нийслэлийн Засаг дарга бөгөөд Улаанбаатар хотын Захирагч, Нийслэлийн онцгой комиссын дарга Д.Сумъяабазар ажиллаж байна. Тодруулбал, Сэлбэ голын баруун, зүүн тал буюу Сүхбаатар дүүргийн 1 дүгээр хороо, Баянзүрх дүүргийн 43 дугаар хороо орчимд газар дээр нь ажиллаж, нөхцөл байдалтай танилцлаа. Одоогоор орон сууцуудын зоорийн давхар болон гараашийн усыг соруулж байгаа бөгөөд хуримтлагдсан лаг, шаврыг цэвэрлэх ажил үргэлжилж байна.
Улмаар үерийн улмаас учирсан хор уршигт дүн шинжилгээ хийхээр боллоо. Мөн учирсан хохирлыг тогтоох, хэрэгцээний үнэлгээ хийх ажлыг нэгдсэн удирдлага, зохион байгуулалтаар хангах үүрэг бүхий Ажлын хэсэг байгуулж, НЗДТГ-ын даргаар ахлуулав. Тус Ажлын хэсэг Гамшгийн хохирол, хэрэгцээний үнэлгээ хийх журамд заасан хугацаанд багтаан дүн мэдээг Нийслэлийн онцгой комисст ирүүлэх юм.
Түүнчлэн Баянгол, Баянзүрх, Сонгинохайрхан, Сүхбаатар, Хан-Уул, Чингэлтэй дүүргийн хэмжээнд үерийн улмаас учирсан хор уршигт дүн шинжилгээ хийх, учирсан хохирлыг тогтоох, хэрэгцээний үнэлгээ хийх үүрэг бүхий Дэд ажлын хэсэг байгуулж, ажиллуулахыг холбогдох дүүргийн Засаг дарга нарт даалгалаа.
Ингэснээр үерийн хохирлыг бодитоор тогтоох нөхцөл бүрдэх юм. Хотын дарга учирсан хохирлыг тогтоох, хэрэгцээний үнэлгээ хийх талаар "Иргэдийн зүгээс тавьж буй санал, хүсэлтийг яаралтай шийдэхэд анхаарна. Нөхцөл байдал хүндэрсэн байршлуудад ажиллаж буй холбогдох газар, албад, алба хаагчид мэдээллээ шуурхай солилцож, уялдаа холбоотой ажиллах нь чухал байна. Шаардлагатай байгаа техник хэрэгсэл, хүн хүчнийхээ мэдээллийг солилцоод шийдүүлээд явах хэрэгтэй. Усанд автсан барилга байгууламжид эрсдэлийн үнэлгээ хийнэ. Үүний дараа хүчитгэх зэргээр холбогдох арга хэмжээг шат дараатай аваад явна” хэмээлээ.
