Уржигдар орой орсон түр зуурын аадар борооны улмаас Төв аймгийн Эрдэнэсант чиглэлийн авто замд их хэмжээний үер бууж, зарим хэсгээрээ эвдэрч, тээврийн хэрэгсэл зорчих аргагүйд хүрсэн гэж орон нутгийн иргэд, жолооч нар олон нийтийн сүлжээнд сэрэмжлүүлэг мэдээ түгээсэн юм. Тус сумын ЗДТГ-ын дарга Н.Сарантуяагаас өчигдөр нөхцөл байдлыг тодруулахад “Энэ сарын 13-ны 17.57-18.12 цагт манай сумын нутагт хүчтэй мөндөр, аадар орсон. Салхины хурд секундэд 22 метр хүрч ширүүссэн. Авто замын 192-195 дахь хэсэг буюу гурван км газарт их хэмжээний үер буусан учир “Эрдэнэсант АЗЗА” ТӨХК-ийнхан тухайн чиглэлд зорчиж явсан 30 гаруй тээврийн хэрэгслийн хөдөлгөөнийг түр хугацаанд хязгаарлаж, зохицууллаа. Гурван машин шаварт суусан, хот хоорондын нэг автобус замын хажуу руу унах гэж байсныг татан гаргасан. Бороо намжсанаас 40 минутын дараа замын хөдөлгөөнийг хэвийн үргэлжлүүлсэн. Зам урсаж, эвдэрсэн зүйл байхгүй. Эрдэнэсант сум дахь 24 мянган га тариалангийн талбайгаас 1060 га нь энэ үеэр мөндөрт цохиулсан. Үүний 70 орчим хувь нь эргэн сэргэхээргүй хэмжээнд сүйдсэн гэсэн урьдчилсан дүгнэлт гаргаад байна. Аадрын үеэр хоёр айлын гэр нурж, 600 гаруй бог үерт урссанаас 428 нь хорогджээ. Үерийн улмаас учирсан хохирлыг эцэслэн тогтоох, замын хажуу хэсэгт хуримтлагдсан лаг, шавар цэвэрлэх, хорогдсон малыг устгах ажлыг орон нутгийн холбогдох байгууллагынхан хийж байна” гэсэн юм.
Төв аймгийн Эрдэнэсант, Лүн чиглэлийн авто зам жил болгон үерт автаж, асуудал дагуулдаг. Бороонд урссан тохиолдол ч хэд хэдэн удаа гарсан. Ийм явдал олон удаа гаргахгүйн тулд ус хуримтлуулах, нөөцлөх сан байгуулах шаардлагатайг судлаачид хэлж байна. “Усны төлөө иргэдийн нэгдэл” төрийн бус байгууллагын тэргүүн З.Батбаяр “Бороо, цас орсон ч үер болдоггүй, ган гачиг тохиосон ч гол, нуур нь хатаж, ширгэдэггүй байлгахын тулд боломжит бүх газарт том, жижиг гэлтгүй усан сан байгуулах хэрэгтэй. Ингэж байж бид гол устайгаа үлдэнэ, гамшгийн аюулаас сэргийлж чадна” гэлээ. Зургадугаар сард Монгол орны нийт нутгаар хур тунадас ахиу орох төлөвтэйг цаг уурын байгууллагаас анхааруулж буй. 17-нд гэхэд төвийн аймгуудыг хамарсан их хэмжээний бороо орно гэсэн урьдчилсан мэдээ бий. Эрдэнэсантад үүссэн нөхцөл байдал цаашдаа өөр олон сумд тохиолдохгүй гэх баталгаа алга.
Бэлтгэсэн: Н.Мишээл
