Манай улс иргэний үнэмлэх болон гадаад паспортынхоо загварыг шинэчлээд буй. Тэгвэл удахгүй жолоочийн үнэмлэхийг ч шинэчлэхээр болсон байна. Уг үнэмлэхийн загварыншинэчилсэн төслийг Хууль зүй, дотоод хэргийн яамнаас боловсруулж, иргэдээс санал авч эхэлжээ. Захиргааны ерөнхий хуулийн дагуу 30 хоногийн хугацаанд олон нийтээс санал авах аж. Цагдаагийн ерөнхий газрын Бүртгэл, хяналтын төвийн дэд дарга, цагдаагийн хошууч Ч.Баяржаргалаас үүний талаар тодруулахад “Манай улс 1997 онд Венийн конвенцыг соёрхон баталснаар гишүүн орноор нэгдсэн. Замын хөдөлгөөний тухай Венийн конвенцын зургадугаар хавсралтад нийцүүлэн тээврийн хэрэгслийн жолоодох үнэмлэхийн загварт зарим өөрчлөлт оруулахаар болсон юм. Ингэхдээ одоогийн үнэмлэхийн хэмжээ, өнгөнд өөрчлөлт оруулахгүй. Харин зарим мэдээллийг өөрчлөх байдлаар загварыг шинэчлэн боловсруулсан.
Ингэснээр Венийн конвенцын гишүүн орнуудад ажиллаж, амьдарч байгаа монгол иргэд үнэмлэхээ оршин суугаа орныхоо жолооны үнэмлэхээр шууд солиулах боломж бүрдэж, тээврийн хэрэгсэл жолоодох эрхтэй болно. Мөн Хүний хувийн мэдээлэл хамгаалах тухай хуулийн дагуу үнэмлэхээс иргэний регистрийн дугаарыг хасахаар болсон юм” хэмээлээ. Үүнтэй холбоотойгоор иргэд үнэмлэхээ заавал шинээр солиулах шаардлагатай, эсэхийг түүнээс лавлахад “Үнэмлэхийн загварыг шинэчлэн баталсантай холбогдуулан иргэдэд хүндрэл учруулахгүй, үнийн дүнд өөрчлөлт оруулахгүй, төсвөөс мөнгө шаардахгүй. Ялангуяа заавал солиулах шаардлага тавихгүй. Өөрөөр хэлбэл, Монгол Улсын жолоочийн үнэмлэхийг 10 жилийн хугацаатайгаар олгодог. Тэгэхээр иргэдийн жолоочийн үнэмлэхийн хүчинтэй хугацаа дуусаагүй бол заавал солиулах шаардлагагүй, хуучнаа ашиглах боломжтой” гэлээ.
