Монгол, Хятадын хэвлэл мэдээллийн XIII форум Улаанбаатар болон Бээжин, Хөх хотноо зэрэг эхэллээ. Монголын Сэтгүүлчдийн нэгдсэн эвлэлээс зохион байгуулж буй эл форумд 120 гаруй төлөөлөгч биечлэн оролцсоноос гадна Монгол, Хятадын сэтгүүлчид цахимаар оролцож, санал бодлоо хэлсэн юм. Форумын чиглүүлэгчээр МСНЭ-ийн Ерөнхий нарийн бичгийн дарга Э.Болортулга, ХКН-ын ӨМӨЗО-ны Намын хорооны Суртал ухуулгын хэлтсийн байнгын дэд дарга Фү Лэй ажиллалаа. Энэ удаагийн форум "Ногоон дэлхийн төлөө сэтгүүлчид нэгдэцгээв" сэдвийн хүрээнд өрнөж буй.
Форумын үеэр Монгол Улсын Ерөнхийлөгчийн Тамгын газрын Хэвлэл мэдээллийн албаны дарга Ө.Золбаяр Ерөнхийлөгч У.Хүрэлсүхийн мэндчилгээг уншиж танилцуулав. Мэндчилгээнд "Монгол, Хятадын хэвлэл мэдээллийн салбарынханд баяр хүргэе. Саяхан БНХАУ-д төрийн айлчлал хийсэн. Энэ үеэр байгаль орчны чиглэлээр хамтран ажиллахаар өргөн хүрээнд ярилцаж, төлөвлөснөө хэрэгжүүлэхээр баталгаажуулсан. Ши Жиньпин дарга байгаль орчны чиглэлээр хамтран ажиллахдаа таатай байгаагаа онцолсон" гэдгийг дурджээ. Мөн БНХАУ-ын Төрийн зөвлөлөөс ч мэндчилгээ ирүүлжээ.
Форумд Монгол Хятадын Байгаль орчин, Экологын сайд нар гол илтгэлийг тавьж, хэлэлцүүлсэн. Түүнчлэн Монгол, Хятадын сэтгүүлчид байгаль орчныг хамгаалахад сэтгүүл зүйн үүрэг оролцоо сэдвээр илтгэл тавьсан. Улмаар байгаль хамгаалах тухай яриа хэлэлцээ хийж, хоёр улсын байгаль орчин, экологийг хамгаалах, хамтын ажиллагааг хөгжүүлэх, гүнзгийрүүлэх нэгдмэл ойлголтод хүрч, идэвхтэй хамтран ажиллахаар ярилцсан байна.
Мөн Монголын үндэсний өдөр тутмын анхны чөлөөт хэвлэл "Өнөөдөр" сонин, ӨМӨЗО-ны Өдрийн сонины хороотой, UBS телевиз Өвөрмонголын радио, телевизтэй хамтран ажиллах санамж бичиг байгуулж, гарын үсэг зурав.
