Нийслэлд өчигдөр 13.00 цагаас эхлэн цас орж, шөнө дүл болтол орсон. Цаснаас үүдэн авто замын зорчих хэсэгт халтиргаа гулгаа үүссэн. Нийслэлийн Хот тохижилтын газар болон зам цэвэрлэгээний байгууллагууд хүндрэлтэй нөхцөл байдал үүсэж болзошгүй даваа гүвээ, зам талбайд халтиргаа гулгаанаас хамгаалахаар зориулалтын давс, бодис цацахаар машин техникт ачилт хийн бэлэн байдлыг ханган, хариуцсан зам талбайд давс, бодис цацалтын ажлыг эхлүүлээд байна.
Улмаар нийслэлийн 9 дүүргийн нутаг дэвсгэрт худалдаа, үйлчилгээ эрхэлж буй аж ахуйн нэгж байгууллага болон төрийн байгууллагууд орчны 50 метрийн цэвэрлэгээ хийж, иргэдийн аюулгүй зорчих нөхцөлийг ханган ажиллахыг уриаллаа.
