Зэвсэгт хүчний 016 дугаар нэгтгэл, Зэвсэгт хүчний 120, 326 дугаар ангийнхан 2021 оны хоёрдугаар ээлжээр хугацаат цэргийн албанд татагдсан түрүүч, байлдагч нараа бэлтгэлээр халах, ангийн Байлдааны туганд хүндэтгэл үзүүлэх ёслолыг зохион байгуулав.
Нэгтгэл, ангиудын захирагч нар эх орныхоо өмнө эцэг эхийн нэрийг бадраан албаа нэр төртэй хаасанд нь баяр хүргээд, цэргийн албанаас авсан төлөвшил, хүмүүжлээ ажил, амьдралдаа тусгаж, үргэлж өнгөлж явахыг захилаа. Мөн цэргийн алба хаасан эр хүн гэдгээрээ бахархаж, сайн нөлөөлөл, сайн үйлдлээрээ гэр бүл, хамт олон, нийгэмдээ үлгэрлэгч нь байгаарай гээд зарим түрүүч, байлдагч нар “Онц буудагч”, “Онц сурлагатан”, “Тамирчин дайчин” тэмдгийг гардуулж, дэд түрүүч, түрүүч цол хүртээж, ар гэрийнхэнд талархлын захидал илгээв.
Зэвсэгт хүчний 326 дугаар ангийнхны хувьд хугацаат цэргийн алба хаагчдадаа дурсгалын цомог хадгалуулахын зэрэгцээ Үлээвэр найрал хөгжмийн салаанд 6 сарын хугацаанд МУСТА, бэлтгэл ахлах ахлагч Ч.Гантөмөр, Д.Одбаяр багш нарын удирдлагад хөгжмийн боловсрол эзэмшсэн 12 түрүүч, байлдагч нарт сертификат гардууллаа. Ингэснээр хугацаат цэргийн алба хаангаа хөгжмийн боловсрол эзэмшиж, энэ төрлийн уран бүтээл хийж, ажил эрхлэх боломжтой болж байгаа ажээ.
