Иргэдийн ая тухтай орчинд амрах, чөлөөт цагаа өнгөрүүлэх нөхцөл бүрдүүлэхээ Дугуй цагаан, Туул голын эрэг орчмын Бага тэнгэрийн ам, АСЕМ вилла хотхоны баруун талд хийж буй амралт, зугаалгын цогцолбор байгуулах ажил үргэлжилж байна.
Нийт 2.1 га талбайд тохижилт хийхээр төлөвлөснөөс одоогоор эхний 3 тойрог болон туслах замын ажлыг дуусгажээ. Үлдсэн тойрог, хүүхдийн тоглоом, угтах хэсгийн барилгын ажлыг тун удахгүй ашиглалтад оруулах аж. Хүүхдийн тоглоом болон явган замд ашиглаж буй модыг Сэлэнгэ аймгийн ойн цэвэрлэгээний модноос авч, үйлдвэрт боловсруулан тохижилтод ашиглаж байна. Дугуй цагаан орчимд хүүхдийн модон тоглоом, явган зам, сити 00, тойрог бүхий тохижилтын талбай, террас, ногоон байгууламж, гэрэлтүүлэг, камержуулалт хийж байна.
Дээрх байршилд тохижилт гүйцэтгэж буй “Цагаан толгой нуур” ХХК-йн захирал Б.Батцэнгэл ярихдаа, “Дугуй цагаанаас дээш өгсөөд горхины дэргэд террас байгуулна. Энэ нь хүмүүс горхины дэргэд суугаад амарч тухлахад зориулагдах юм. Явган хүний замыг мод, чулуугаар хийж байгаа. Халтиргаа гулгаагүй мод, чулууг сонгосон нь бетон замаас урт настайн дээр эко бүтээгдэхүүн гэдгээрээ онцлог” гэжээ.
Тусгай хамгаалалттай газар нутагт тохижилт хийхдээ байгалийн унаган төрхийг алдагдуулахгүй байхаар хуульчилсан байдаг. Энэ дагуу байгалийн тогтоц, унаган төрхийг хадгалсан ногоон байгууламж байгуулж, тохижилтод байгалийн боржин чулуу, ойн цэвэрлэгээнэс гарсан модыг ашиглаж байгаа. Түүнчлэн хүүхдийн тоглоомын талбайг байгалийн унаган төрхийг хадгалсан, өвөрмөц байдлаар, байгальд ээлтэй байх шийдлийг нэвтрүүлжээ. Дугуй цагаан орчмын явган хүний замын өргөн 3.5 метрээс багагүй байхаар бүтээсэн байна.
