Баянгол дүүргийн Улсын бүртгэлийн хэлтсийн иргэний улсын бүртгэгч Г.Ган-Утас, тус хэлтсийн хороо хариуцсан бүртгэгч асан С.Энхчимэг нарыг хууль зөрчин харийн оронд амьдардаг В.Алтангэрэл гэдэг иргэнд гадаад паспорт гаргаж өгсөн хэрэгт холбогдуулан шалгажээ. С.Энхчимэг нь нөгөө бүртгэгчээсээ гуйснаар 2020 оны аравдугаар сард ийнхүү албан тушаалаа ашиглан хийх ёсгүй үйлдэл гаргаж, В.Алтангэрэлийн гадаад паспорт хүссэн мэдүүлгийг хүлээн авч, зөвшөөрөл олгосон хэсэгт гарын үсэг зурж баталгаажуулан, улмаар Е серийн паспорт олгосон байна. Тиймээс НПГ-аас тэдэнд Эрүүгийн хуулийн 22.1-1 дэх хэсгийн “Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, бусдад давуу байдал бий болгосон” хэмээн яллах дүгнэлт үйлдээд Баянгол дүүргийн Эрүүгийн хэргийн анхан шатны шүүхэд хүргүүлээд байна. Ташрамд дурдахад, прокурорын байгууллага энэ сарын 16-20-нд мөрдөн байцаалтын 2934 хэрэгт хяналт тавьж, 238-д нь яллах дүгнэлт үйлдэн шүүхэд шилжүүлсний дунд дээрх хэрэг багтаж буй юм. Шүүхэд шилжүүлсэн эрүүгийн хэргүүд дотор эрүүл мэндийн халдашгүй байдлын эсрэг 142, бэлгийн эрх чөлөө, халдашгүй байдлын эсрэг 10, өмчлөх эрхийн эсрэг 76, хүрээлэн байгаа орчны эсрэг 10, авлигын болон мөнгө угаасан хэрэг тус бүр гурав, мансууруулах эм, сэтгэцэд нөлөөт бодисыг хууль бусаар ашигласан хоёр, хөдөлгөөний аюулгүй байдал, тээврийн хэрэгслийн ашиглалтын журмын эсрэг 21 хэрэг багтжээ.
