Нийслэлийн удирдлага хотынхны усны тулгамдсан асуудлыг хэлэлцэж байна. “Геодези, усны барилга байгууламжийн газар” ОНӨААТҮГ-ын Ерөнхий инженер С.Батсайхан "Улаанбаатар хотын инженерийн бэлтгэл арга хэмжээний өнөөгийн байдал сэдвээр“ сэдвээр илтгэл тавив. Тэрбээр "1995-2021 онд 45 удаа үер болсон. Үүний 60 хувь нь 2000-2009 онд тохиолдож байсан. 2020 онд болсон үерийн улмаас л гэхэд зургаан байршилд далан суваг эвдэрч, 60 барилга усанд автсан. Үерийн хамгаалалтын далан сувгийн 36 хувийнх нь насжилт хэтэрсэн бол ус зайлуулах шугам сүлжээний 22 хувийнх нь ашиглалтын хугацаа бүрэн дууссан. Судалгаагаар инженерийн бэлтгэл арга хэмжээ доогуур үнэлгээтэй гарсан. Үерийн хамгаалалтын далан сувгийн цэвэрлэгээ, үйлчилгээг жилд гурван удаагийн давтамжтай хийдэг" гэв.
Мөн Нийслэлийн усны чанар, аюулгүй байдалд хийсэн хяналт, шалгалтын нэгдсэн дүн, шаардлагатай арга хэмжээний талаар Мэргэжлийн хяналтын ерөнхий газрын Эрүүл ахуй, халдвар, хамгааллын улсын ахлах байцаагч Б.Баясгалан “Манай байгууллага улсын хэмжээнд жилд 1600 орчим дээжийг шинжилгээнд хамруулдаг. Хотын хэмжээнд 400 орчим дээжийг шинжилгээнд хамруулж байна. Нян судлалын шинжилгээгээр нийслэлийн хэмжээнд 2011 онд нянгийн бохирдол нийт сорьцын 16-17 хувьд илэрдэг байсан бол 2021 онд 3.6 хувь болж буурсан. Нянгийн бохирдлын түвшин буурч байгаа. Энэ нь дотоодын хяналтыг сайн хийсэнтэй холбоотой” гэдгийг онцлов.
