Европын хөлбөмбөгийн солилцоо наймааны улирал өчигдөр дуусаж, олон шилдэг тоглогч багаа солилоо. Тэдгээрээс онцлох наймаануудыг сонирхуулья.
- Лионел Месси (чөлөөт агент)
- Хуучин баг: “Барселона”
- Шинэ баг: ПСЖ
Санхүүгийн хүнд байдал болон Ла лигийн шинэ зохицуулалтаас шалтгаалж аргентин од олон жил хүчин зүтгэсэн багаа орхихоос аргагүй байдалд орлоо. Домогт тоглогчоо авч үлдэх хэд хэдэн оролдлого нь бүтэлгүйтсэнээр “Барса” бууж өгсөн юм. Л.Мессигийн очих боломжтой багийн тоонд ПСЖ, “Манчестер сити” орж байсан ч тэрбээр Францын багийг сонгов. Өнгөрсөн сарын 28-нд Л.Месси “Реймс”-ийн эсрэг тоглолтод ПСЖ-гийн төлөө эхний тоглолтод сэлгээгээр талбайд гарч, К.Мбаппегийн оронд талбайд гарсан. Тэрбээр багийнхаа хэд хэдэн аюултай довтолгоонд оролцсон ч эсрэг багийн хаалга руу нэг ч цохиогүй юм. “Лео сайн тоглолоо. Тэрбээр формондоо хараахан ороогүй ч бэлтгэлд идэвхтэй оролцож байгаа” хэмээн дасгалжуулагч М.Почеттино ярьжээ.
- Криштиану Роналду (15 сая евро)
- Хуучин баг: “Ювентус”
- Шинэ баг: “Манчестер юнайтед”
Ийнхүү Криш хуучин багтаа эргэж ирлээ. Тэрбээр эл түүхэн алхмаа хуучин дасгалжуулагч А.Фергюсонд зориулж буйгаа илэрхийлсэн бөгөөд “улаан чөтгөрүүд”-тэй хоёр жилийн гэрээ байгуулав. Эл наймааны дараа МЮ португал тоглогчийг өмнөх “7” дугаартай нь тоглуулахын тулд Премьер лигээс зарим тоглогчийнхоо дугаарыг өөрчлөх хүсэлт тавьжээ (Э.Кавани “7” дугаарыг эзэмшиж буй).
- Жэк Грилиш (117.5 сая евро)
- Хуучин баг: “Астон вилла”
- Шинэ баг: “Манчестер сити”
Англи хагас хамгаалагч 2021оны зуны хамгийн үнэтэй наймааны эзэн болсон. Тэрбээр өнгөрсөн сарын 5-нд “Сити”-тэй гэрээ байгуулж, “10” дугаарыг авснаас гадна зургаан жилийн гэрээ байгуулав. Одоогоор шинэ багийнхаа төлөө дөрвөн тоглолтод оролцохдоо нэг гоол, нэг гоолын дамжуулалт өгсөн. Тэрбээр П.Гвардьолатай хамт ажиллах мөн “Аваргуудын лиг”-т түрүүлэх хүсэлдээ хөтлөгдөн “Сити”-г сонгосон гэдгээ илэрхийлсэн.
- Ромелу Лукака (115 сая евро)
- Хуучин баг: “Интер”
- Шинэ баг: “Челси”
Р.Лукакаг явуулсанд Италийн багийн хөгжөөн дэмжигчид тун дургүй байсныг дурдах хэрэгтэй. Бельги довтлогч Английн багтай таван жилийн гэрээ байгуулж, эхний тоглолтдоо л “Арсенал”-ын хаалганд хожлын гоол оруулсан. Тэрбээр 2011 оны наймдугаар сард анх “Челси”-д “Андерлехт” багаас 15 сая еврогоор үнэлэгдэн ирсэн ч гараанд тоглож чадахгүй байсаар хэд хэдэн багт зээлээр тоглосон. Улмаар 2014 онд “Эвертон” багт 35 сая еврогоор зарагдаж байв.
- Жэйдон Санчо (85 сая евро)
- Хуучин баг: “Борусси” Дортмунд
- Шинэ баг: “Манчестер юнайтед”
Бундеслигт хоёр улирал дараалан гялалзтал тоглосноор 21 настай залуу тоглогч өсөж яваа оддын тоонд баттай бичигдэх болсон. Сонирхолтой нь “Сити”-гийн академийн төгсөгч түүнийг Манчестерийн нөгөө багт ирэхэд нь “Юнайтед”-ийн хөгжөөн дэмжигчид “Манчестерийн зөв багт тавтай морил” хэмээн угтсан аж. Англи тоглогч Манчестерийн “зөв баг”-тай нь таван жилийн гэрээ байгуулж, “25” дугаарыг сонгожээ. Ж.Санчо одоогоор Премьер лигийн гурван тойргийн тоглолтод оролцоод буй ч гоол, эсвэл гоолын дамжуулалт өгөөгүй байна. “Европын аваргын тэмцээний дараа Жэйдон амарсан мөн эрүүл мэндийн асуудалтай тулгарсан. Багийнхантайгаа цөөн удаа бэлтгэл хийгээд байна. Тиймээс түүнээс ихийг шаардалгүй хүлээх хэрэгтэй” хэмээн О.Сульшер ярьжээ.
- Жанлуижи Доннарумма
- (чөлөөт агент)
- Хуучин баг: “Милан”
- Шинэ баг: ПСЖ
Итали хаалгач “Интер”-ийн төлөө зургаан жил хүчин зүтгэхдээ 251 тоглолтод оролцож, үүнээс 88-д нь хаалгандаа гоол алдаагүй юм. ПСЖ харин Европын аварга тоглогчийг үнэгүй авах боломжийг алдсангүй, энэ зуны шилдэг чөлөөт агент тоглогчийг “олзлов”. Ж.Доннарумма ПСЖ-тэй таван жилийн гэрээ хийсэн бөгөөд улирлын эхний тоглолтод оролцсонгүй, сэлгээнд суужээ.
- Серхио Рамос (чөлөөт агент)
- Хуучин баг: “Реал”
- Шинэ баг: ПСЖ
Энэ зун чөлөөт агент болсонС.Рамос (35 нас) Францын багтай хоёр жилийн гэрээ байгуулж, “4” дугаартай тоглох болов. Тэрбээр эл багт ирэх зорилгоор “Сити”, “Арсенал”-ын саналаас татгалзсан юм. Гэвч испани тоглогч шинэ багтаа хараахан тоглож амжаагүй байгаа бөгөөд “Cadena ser” сонины мэдээлж буйгаар багийн андууд болон албаны хүмүүстэй С.Рамос дээрэлхүү харилцаж буй нь ПСЖ-ийн удирдлагад таалагдахгүй байгаа гэнэ. Хэрэв түүнийг эл дутагдлаа засахгүй бол гарааны бүрэлдэхүүнд тоглуулахгүй гэж дасгалжуулагч М.Почеттино анхааруулга өгсөн аж.
Дээрх тоглогчдоос гадна Р.Варан (“Реал”-аас “Манчестер юнайтед”), А.Хакими (“Интер”-ээс ПСЖ), М.Депай (“Лион”-оос “Барселона”), А.Гризманн (“Барселона”-гаас “Атлетико”) нарын шилдэг тоглогч багаа солиод байна.
Бэлтгэсэн Э.Манлайбаатар
