Залуусыг хөдөлмөрт бэлтгэж, хөдөлмөр эрхлэх хүсэл сонирхлыг татах, улмаар ажилтай, орлоготой болгох зорилготой “ОРОЛЦОО” төслийн бүртгэл эхэлж байна. Төсөлд 18-34 насны, сүүлийн 3 сар ажил, хөдөлмөр эрхлээгүй, их дээд сургууль болон мэргэжлийн боловсролын байгууллагад суралцдаггүй залуус бүртгүүлэх боломжтой. Өөрөөр хэлбэл, ажилтай, орлоготой болж ирээдүйгээ өөрчлөх хүсэлтэй залуусыг “ОРОЛЦОО” төсөлд www.e-mongolia.mn цахим системээр дамжуулан бүртгэнэ. Бүртгэл 2021 оны наймдугаар сарын 16-22-нд үргэлжилнэ.
Төсөлд хэрхэн бүртгүүлэх вэ
Та www.e-mongolia.mn төрийн үйлчилгээний цахим хуудсанд өөрийн нэр дээрх гар утасны дугаар болон интернет банкны эрхээрээ нэвтэрч орон “ОРОЛЦОО” төсөл гэсэн цэс дээр дарснаар бүртгэлийн асуултууд гарч ирнэ. Дахин онцлоход цахим систем зөвхөн 18-34 насны залуучуудыг бүртгэх бөгөөд Та өөрийн регистрийн дугаараа оруулан шалгуулах аж.
