Элсэлтийн ерөнхий шалгалт (ЭЕШ) зохион байгуулах бэлтгэл ажлыг эрүүл ахуй, халдвар хамгааллын дагуу хийж буй, эсэхийг нийслэлийн Мэргэжлийн хяналтын газраас шалгажээ. Улаанбаатар хотын хэмжээнд 2020 оны ЭЕШ-ыг 43 байршилд зохион байгуулж, 11 101 шалгуулагч хамрагдах юм. Эхний ээлжид 34 байршлыг шалгасан бөгөөд сурагчид 55 хаалгаар орж, 49-өөр нь гарах аж. Хэрэв коронавирусийн сэжигтэй тохиолдол илэрвэл тусгаарлах өрөө 57-г бэлтгэжээ. Дээрх байршлаас дөрөвт нь зураглал хийж байршуулаагүй, тавд нь санамж, зөвлөмжийг зохих газруудад байрлуулаагүй, хоёрт нь гар угаах нөхцөл бүрдүүлээгүй, 13-т нь гар халдваргүйжүүлэх уусмал бэлдээгүй байжээ. Мөн ахуйн хэрэглээний халдваргүйжүүлэх бодисоор хоёр байрыг хангаагүй байсан гэнэ. Нийт 805 анги, танхимд шалгалт авахаас 457 буюу 56.7 хувьд нь хяналтын камер суурилуулаагүй аж.
