“Улаанбаатар Photo week-2024” буюу гэрэл зургийн долоо хоног үзэсгэлэнг “Гэрэл зураг-Миний нэрийн хуудас” сэдвийн хүрээнд 2024 оны гуравдугаар сард зохион байгуулахаа Монголын Гэрэл зурагчдын нэгдсэн холбоо мэдэгдэв. Тодорхой хэлбэл, “Улаанбаатар Photo week-2024” арга хэмжээ, шилдэг бүтээлийн үзэсгэлэн 2024 оны гуравдугаар сарын 15-22-ны өдрүүдэд Уран зургийн галлерейд болно. Уг үйл ажиллагаа нь МГЗНХ-ны гишүүн гэрэл зурагчид, тэдний шилдэг бүтээлийг Соёлын яамны дэмжлэгтэйгээр олон нийтэд таниулан сурталчлах, гэрэл зургийн үнэ цэн, үнэлэмжийг дээшлүүлэх зорилготой юм.
Энэхүү үзэсгэлэнд бүтээлээрээ оролцохыг хүссэн гэрэл зурагчид товч намтар, сонгосон шилдэг 10 бүтээл, өөрийн хөрөг, уран бүтээлийн үндсэн зорилго, санааг тодорхой товч бичиж, хавсарган 2024 оны хоёрдугаар сарын 25-ны дотор МГЗНХ-ны цахим хаягаар илгээх боломжтой.
Ирүүлэх бүтээлд нь 2023-2024 онд авсан гэрэл зургууд байх шаардлага тавьжээ. Гэрэл зурагчдын бүтээлийг “Ажлын хэсэг” хүлээн авч, нэргүйгээр, битүү дугаартайгаар Уран сайхны зөвлөлд шилжүүлнэ. Уран сайхны зөвлөл ирүүлсэн зургаас хянан сонгож, өнөөгийн монголын гэрэл зургийн өнгийг тодорхойлох бүтээлүүдийг шалгаруулж үзэсгэлэнд бэлтгэх аж.
Улмаар МГЗНХ- ноос хэвлэлт, бусад зохион байгуулалтын зардлыг хариуцах ба шилдэг бүтээлээс түүвэрлэн цомог, каталог хэвлүүлэх юм байна.
