Дартсын өсвөр үеийн тамирчдад “JDC аdvanced tour-2024”-т оролцох эрх олгох 16 цуврал тэмцээний эхнийх нь Английн Ковентри хотод болж өндөрлөв. Тус тэмцээнд ур чадвараа сорьсон Монголын дартсчдаас “MGL darts” клубийн тамирчин Х.Тэргэл аваргын төлөө эзэн орны шилдэг тоглогч Оливер Хаугантай таарсан. Тэрбээр хамгийн хүчтэй өрсөлдөгч болох уг тамирчныг нутгийнх нь дэвжээнд 6:3-аар буулган авч, “Tour card”-ын эзэн болсон юм. Зөвхөн түрүүлсэн тамирчин энэ картыг эзэмшдэг. Ийнхүү тэрбээр ирэх 3-7 дугаар сар хүртэл үргэлжлэх “JDC аdvanced tour-2024”-т өрсөлдөх шилдгийн шилдэг 32 тамирчны нэгээр шалгарлаа.
Олон улсын уг тэмцээнд өрсөлдсөн өсвөрийн үеийнхэн цаашид мэргэжлийн тамирчин болох замналаа эхлүүлдэг аж. Дартсын спорт сонирхогчдыг баярлуулсан Х.Тэргэлийн “цойлсон” амжилт Монголд эл спорт үүсэж хөгжсөний 30 жилийн ойд зориулж барьсан томоохон бэлэг байв.
Ташрамд дурдахад, дартсын мастеруудын ДАШТ-д оролцох сонгон шалгаруулалтын тэмцээнд өрсөлдөхөөр манай ахмад тамирчид Английг зорьжээ.
