Өнөөдөр гадаа 14 хэм дулаан байна. Таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй
Аравдугаар сарын 24-ний өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 297 дахь өдөр бөгөөд он дуусахад 68 хоног үлдлээ.
- Цаг агаар өдөртөө 15 хэмийн дулаан бол шөнөдөө 0 хэм хүйтэн байх нь ээ.
- Билгийн тооллын 10, Ангараг гараг. Чөдөр одтой , хөхөгчин туулай өдөр. Өдрийн наран 7 цаг 24 минутад мандан, 17 цаг 49 минутад жаргана. Тухайн өдөр хонь, гахай жилтнээ аливаа үйлийг хийхэд эерэг сайн ба бич, тахиа жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр гэмтнийг шийтгэх, гарагийг тахих, мал аж ахуйн үйл, удирдлагын суудалд суух, огторгуйн үүдийг боох, их хүмүүнтэй уулзахад сайн. Газар хагалах, ус булгийн эх малтах, улаа гаргах, хиншүү хярвас гаргах, балгадын суурь тавих, нохой худалдан авахад муу. Өдрийн сайн цаг нь хулгана, бар, туулай, морь, хонь, тахиа болой. Хол газар яваар одогсод зүүн хойш мөрөө гаргавал зохистой. Үс шинээр үргээлгэх буюу засуулбал эрч, хүч ихсэнэ.
- Манай улсын голлох валют болох ам.долларын авах ханш 3453.00 төгрөг, зарах нь 3457.00 төгрөг байна. Харин рублийн авах ханш 35.00, зарах ханш 35.60, юанийн авах ханш 475.00, зарах ханш 476.80, вонийн авах ханш 2.59, зарах ханш 2.61 төгрөг байна.
Өнөөдөр болох онцлох үйл явдлууд:
- 08.00-09.00 цагт: УИХ-ын ажлын хэсэг, байнгын хороод хуралдана.
- 09.30 цагт: “Блью Скай” зочид буудалд: Монгол дахь Америкийн худалдааны танхим (АмЧам)-ын 10-р сарын хурал болж, “Монгол Улсын эдийн засгийн 2024 оны төлөв”-ийн талаар хэлэлцэнэ.
- 10.00 цагт: Төрийн ордонд: Ковидын үед авч хэрэгжүүлсэн төсөл хөтөлбөрийн санхүүгийн зарцуулалтыг нийтэд ил болгох Ерөнхий хяналтын сонсгол 2 дахь өдрөө үргэлжилнэ.
- 10.00 цагт: Нээлттэй нийгэм форумд: Монгол Улсын 2024 оны төсвийн хэлэлцүүлэг болно.
- 11.30 цагт: ОХУ-ын Шадар сайд В.В.Абрамченко болон Боловсрол, шинжлэх ухааны дэд сайд К.И.Могилевский нар Плехановын нэрэмжит их сургуулийн Улаанбаатар дахь салбар сургуульд зочилж, сургалтын орчинтой нь танилцаж, шинэчлэн засварласан бассейныг нээх үйл ажиллагаанд оролцоно.
- 11.30 цагт: “ЗМ” сонины мэдээллийн төвд: МУСТА, дуучин Б.Наранцогтын анхны бие даасан "Хөгжмийн эгшиг" тоглолтын талаар мэдээлнэ. Утас: 8805-7070.
Энэ өдөр дэлхийн түүхэнд:
- 1985 оны энэ өдөр Английн хөлбөмбөгчин Уэйн Рүүни мэндэлжээ.
- 1994 оны энэ өдөр F(x) хамтлагын гишүүн Кристал (Chrystal Soo Jung) мэндэлжээ.
- 2011 онд Британы алтернатив рок чиглэлээр тоглодог Колдплей хамтлагийн 5 дахь албан ёсны цомог "Mylo Xyloto" цацагджээ. Тус албум нь гарснаасаа хойш дэлхий даяар 17 улсын цомгийн борлуулалтын жагсаалтыг тэргүүлсэн бөгөөд Британид тэргүүн байранд орсон тэдний 5 дахь цомог нь Mylo Xyloto болжээ.
- Өнөөдөр АНУ-д Хоолны өдөр тохиож байгаа юм байна.
- 1973 оны Хүйтэн дайны нэг хэсэг болох Египет болон Сирийн Израйлийн эсрэг дайн төгсгөл болжээ.
