Австрали, Шинэ Зеланд улсад эмэгтэйчүүдийн хөлбөмбөгийн ДАШТ маргааш эхэлнэ. Энэ удаагийн ДАШТ наймдугаар сарын 20 хүртэл дээрх хоёр улсын 10 цэнгэлдэх хүрээлэнд явагдана. Нээлтийн тоглолт Оклэндийн “Эден парк”-т Шинэ Зеланд, Норвегийн багийн хооронд болох юм. Мөн энэ өдрийн хоёр дахь тоглолт Австрали, Ирландын хооронд Сидней хотод болно. Харин аваргын төлөөх тоглолт “Сидней” цэнгэлдэх хүрээлэнд зохион байгуулахаар төлөвлөсөн. Хэсгийн тоглолтууд наймдугаар сарын 3-нд дуусаж, хоёр өдрийн дараачаас хасагдах шат эхэлнэ.
Энэ жилийн тэмцээнд анх удаа 32 баг оролцох юм. Багуудын тоог ийн нэмснээр Ирланд, Замби, Панам, Вьетнам, Хаити, Португал, Марокко, Филиппиний бүсгүйчүүд ДАШТ-д анх удаа оролцох боломж бүрдсэн.
Харин тэмцээнд аваргалах боломжтой багуудын тоонд “хашир бурхи”-нууд буюу дэлхийн дөрвөн удаагийн аварга АНУ, хошой аварга Герман, тус бүр нэг удаа түрүүлсэн Норвег, Япон орж байгаа юм. Тэдэнтэй өнгөрсөн жилийн Европын аварга Англи, Америкийн цомд түрүүлсэн Бразил, Африкийн цомын аварга ӨАБНУ, Азийн аварга БНХАУ, ДАШТ-д анх удаа оролцож буй Арабын улсуудын төлөөлөл Марокко хүчтэй өрсөлдөх биз ээ.
БАГУУД
- A хэсэг: Шинэ Зеланд, Норвег, Филиппин, Швейцар
- B хэсэг: Австрали, Ирланд, Нигери, Канад
- C хэсэг: Испани, Коста-Рика, Замби, Япон
- D хэсэг: Англи, Дани, БНХАУ, Хаити
- E хэсэг: АНУ, Вьетнам, Нидерланд, Португал
- F хэсэг: Франц, Ямайк, Бразил, Панам
- G хэсэг: Швед, ӨАБНУ, Итали, Аргентин
- H хэсэг: Герман, Марокко, Колумби, БНСУ
ЦЭНГЭЛДЭХ ХҮРЭЭЛЭН
Австрали
- Сидней хот: “Австрали” (83 500 хүний багтаамжтай), “Сидней” (42 512)
- Брисбэн: “Ланг парк” (52 263)
- Мельбурн: “ААМИ парк” (30 052)
- Перт: “Перт арена” (22 225)
- Аделаид: “Хайндмарш стэдиум” (18 435)
Шинэ Зеланд
- Оклэнд: “Эден парк” (48 276)
- Веллингтон: “Скай стэдиум” (39 000)
- Данидин: “Форсайт Барр стэдиум” (28 744)
- Хамилтон: “Вайкато стэдиум” (25 111)
ШАГНАЛЫН САН
ФИФА энэ удаагийн ДАШТ-ий төсвийг 140 сая евро болгож нэмэгдүүлсэн. Үүнээс 110 сая нь шагналын сан юм. Хэсгийн шатанд багууд тус бүр 28 мянга, хасагдах шатанд шалгарвал 55 мянга, финалд тогловол 178 мянган еврогийн шагнал хүртэнэ.
Бэлтгэсэн: Н.Энх
