Улаанбаатар хот олон улсын стандартад нийцсэн, спорт авиралтын хурдны ханатай болжээ. Энэхүү төслийг “Улаанбаатар залуусын оролцоо” төрийн бус байгууллагын дэргэдэх “Улаанбаатар аялагч” клубээс санаачилсан бөгөөд ижил чиглэлээр үйл ажиллагаа явуулдаг байгууллагууд, спорт авиралтаар хичээллэдэг хүмүүс санхүүгийн болон техник хэрэгслийн туслалцаа үзүүлжээ. Мөн “Уранган” группийн “UG arena” спорт цогцолбор, “Ган” төвийн хамт олон дэмжин ажилласан байна. Монголдоо анхдагч гэгдэх хурдны ханыг “UG arena” спорт цогцолборын гадаа байгуулжээ. Үүн дээр спорт авиралтын хотын аварга шалгаруулах тэмцээнийг энэ сарын 25-27-нд зохион байгуулах аж.
Бэлтгэсэн: Н.Мишээл
