Прокурорын байгууллага энэ оны гуравдугаар сарын 22-26-ны өдөр 230 хэрэгт яллах дүгнэлт үйлдэн шүүхэд шилжүүлжээ. Үүнээс 130 хэргийг нь нийслэл, дүүргийн прокурорын газрууд хянасан байна. Дээрх хугацаанд прокуророос эрүүгийн болон зөрчлийн хэрэг хянан шийдвэрлэх ажиллагаанд оролцогчдоос гаргасан 84 гомдол, 73 хүсэлтийг шийдвэрлэсэн бол тодорхой ажиллагаа гүйцэтгүүлэхээр мөрдөгчид болон зөрчлийн хэрэг бүртгэх эрх бүхий албан тушаалтанд нийт 299 даалгавар бичгээр өгсөн байна.
Прокурор гэмт хэргээс урьдчилан сэргийлэх зорилгоор гэмт хэрэг, зөрчил гарахад нөлөөлсөн шалтгаан, нөхцөлийг арилгуулахаар байгууллага, албан тушаалтанд 17 мэдэгдэл хүргүүлсэн. Харин зөрчил шалган шийдвэрлэх, хэрэг бүртгэх, мөрдөн байцаах, ял эдлүүлэх ажиллагааг хэрэгжүүлэх явцад гарсан зөрчил, түүнд нөлөөлсөн шалтгаан, нөхцөлийг арилгуулахаар прокурорын шаардлагыг таван газарт хаяглан илгээжээ.
