Архангай, Төв, Завхан, Өвөрхангай, Дундговийн хойд хэсэг, Булган, Сэлэнгэ, Говь-Алтай, Өвөрхангай, Баян-Өлгий, Баянхонгорын өмнөд хэсгээр өчигдөр цасан шуурга шуурч, салхи секундэд 18-20 метр хүрч ширүүссэн гэж Цаг уур, орчны шинжилгээний газраас мэдээллээ. Харин өнөөдөр нутгийн зүүн хагаст, цаашдаа зүүн аймгуудын ихэнх нутгаар хүйтний эрч чангарч баруун зүгийн нутгаар шөнөдөө 35-40, өдөртөө 22-27, төвийн нутгаар шөнөдөө 30-35, өдөртөө 18-23, бусад нутгаар шөнөдөө 22-27, өдөртөө 9-14 градус хүрч хүйтрэхийг малчид, тээвэрчдэд онцгойлон анхаарууллаа.
Улаанбаатараас Дархан чиглэлийн, Улаанбаатараас Мандалговь хүрэх авто зам цасан болон шороон шуурганы улмаас зорчиход хүнд болж, хариуцсан компаниуд замын цасыг цэвэрлэж байгааг Авто тээврийн үндэсний төвөөс мэдээлэв. Иймд тээвэрчид, ард иргэдийг онцын шаардлагагүй бол хувийн тээврийн хэрэгслээр зорчихгүй байх, зорчсон тохиолдолд хурдаа тохируулан, замын хөдөлгөөнд анхаарал болгоомжтой оролцох, тээврийн хэрэгслийн бүрэн бүтэн байдлыг хангах, хамгаалах бүс тогтмол зүүж, аюулгүй байдлаа сайтар ханган хөдөлгөөнд оролцож Авто тээврийн үндэсний төвийн 24 цагийн хяналттай тээврийн хэрэгслийг сонгон үйлчлүүлэхийг анхаарууллаа.
