“Утаагүй Дархан” хөтөлбөрийн хүрээнд энэ өвөл Дархан сумын 15 дугаар багийн 2160 өрхөд хагас коксжуулсан түлшийг туршин хэрэглүүлэхээр боллоо. Эхний ээлжинд дээрх өрхүүдийн мод, нүүрс, хагас коксжуулсан түлш зэрэг гурван төрлийн түлшний хэрэглээнд аймгийн Захирагчийн алба, Хөгжлийн бодлогын хэлтэс, Стандартчилал хэмжил зүйн газар зэрэг холбогдох мэргэжлийн байгууллагууд хамтран дүгнэлт хийсний үндсэн дээр ирэх жилээс Дархан сумын 1, 2, 3, 6, 7 зэрэг гэр хорооллын төвлөрөл ихтэй багуудад хагас коксжуулсан түлшийг нэвтрүүлэхээр төлөвлөж байна. Тус түлшийг “Нако түлш” ХК нийлүүлж байгаа бөгөөд энэ оны 12 дугаар сарын 31-ний өдрийг дуустал түүхий нүүрсний үнээр 40 цэгт борлуулах юм.
Хагас коксжуулсан түлшийг нүүрсийг хагас коксжуулсан байгууламж дунд 450-6500С –ийн хэмийн дулаан боловсруулалтанд оруулж гаргадаг байна. Эцсийн бүтээгдэхүүн нь хагас кокс, давирхай, шатдаг хий бөгөөд тус түлшний дулаан ялгаруулах чадвар нь 5500-6500 ккал/кг, чийглэг нь 5 хувиас ихгүй байдаг ажээ. Ийнхүү гаргаж авсан түлш нь агаарын бохирдлыг бууруулах, өрхийн эдийн засагт хэмнэлттэй, эрүүл мэндэд тустай гэдгийг холбогдох мэргэжлийн байгууллагууд баталж байгаа юм.
Өнгөрсөн хоёр жил Шарын гол, Орхон сумд болон Дархан сумын 15 дугаар багийн иргэд хагас коксжуулсан түлшийг хэрэглэсэн бөгөөд хэрэглэгчдийн зүгээс утаа гардаггүй, угаар үнэртдэггүй, шаталт удаан гэсэн үнэлгээг өгчээ.
