Ром хотноо 2024 оны дөрөвдүгээр сарын 20-ноос тавдугаар сарын 1-ний өдрүүдэд зохион байгуулагдсан Азийн улс орнуудын соёл урлаг, ёс заншил, бараа бүтээгдэхүүнийг сурталчлан таниулдаг “Дорнын фестиваль“ (Festival Dell’Oriente) олон улсын үзэсгэлэнд Монгол Улс Зочин орноор оролцов.
Жил бүр Италийн 11 хотод зохион байгуулагдаж олон сая хүн оролцдог энэхүү үзэсгэлэнд Засгийн Газрын Хэрэгжүүлэгч Агентлаг Жижиг дунд үйлдвэрийн газар, Засгийн газрын хэрэгжүүлэгч агентлаг Хөгжлийн бэрхшээлтэй хүний хөгжлийн ерөнхий газар, Мишээл Экспо компанийн төлөөлөл өргөн бүрэлдэхүүнтэйгээр “Монголд үйлдвэрлэв” бараа бүтээгдэхүүнээрээ оролцлоо. Үзэсгэлэнгийн үеэр язгуур урлагийн Хөх Монгол хамтлагийн тоглолт, үндэсний бүжиг, үндэсний хувцасны үзүүлбэр, зургийн үзэсгэлэн, монгол уран бичлэг зэрэг арга хэмжээнүүд зохион байгуулагдав.
