Саудын Арабын “Аль-Наср” баг Азийн “Аваргуудын лиг”-ийн тавдугаар тойрогт Ираны “Персеполис” багтай 0:0-ээр тэнцлээ. Тийм ч ач холбогдолгүй уг тоглолт хөл бөмбөг сонирхогчдын талархал сайшаалыг хүртэх ёстой К.Роналдугийн гайхалтай үйлдлээр олны анхааралд өртөв.
Тоглолтын хоёр дахь минутад К.Роналду эсрэг багийн торгуулийн талбайд өрсөлдөгчтэйгөө мөргөлдөж унасан байна. Шүүгч тэр даруй торгуулийн цохилт заасан ч португал тоглогч торгуулийн цохилтыг болиулахаар талбайн шүүгчийг ятгаж эхэлсэн байна. Шүүгч түүний хүсэлтийг харгалзан үзээд бичлэг ухрааж үзсэний эцэст үнэхээр алдаа байгаагүй учир шийдвэрээ өөрчилжээ. Сонирхолтой нь, баг нь илт давуу ялаагүй, тоглолтын хувь заяа хаашаа эргэх нь тодорхойгүй мөчид К.Роналду ийм үйлдэл гаргасан юм. “Персеполис” баг Ираны лигт зургаадугаарт байрт бичигдэж буй ч дутуу тоглолтууддаа хожвол хоёрдугаарт орох боломжтой. Тус баг өнгөрсөн улиралд улсынхаа аваргаар шалгарсан юм.
Ийнхүү 11 метрийн торгуулийн цохилтоо сайн дураар “хасуулж”, хамгаалагч А.Лажами нь 17 дахь минутад улаан хуудас авснаар “Аль-Наср” баг энэ улирлын “Аваргуудын лиг”-ийн хэсгийн тоглолтод анх удаа оноо алдлаа. Гэвч тэд таван онооны илүүтэйгээр хэсгээ итгэл төгс тэргүүлж байна. Тэдний ард “Персеполис” бичигдэж буй билээ. Өөрөөр хэлбэл, хэрэв К.Роналду торгуулийн цохилтоор багтаа ялалт авчирсан бол баг нь хэсгийн зургаан тоглолтдоо бүгдэд нь ялах боломжтой байжээ.
К.РОНАЛДУ САУДЫН АРАБТ ЖИЛТ ҮЗҮҮЛЭЭД БАЙНА ВЭ
- Тэрбээр энэ улиралд дээд лигт хамгийн олон буюу 15 гоол оруулаад байна. Мөн долоон оновчтой дамжуулалт өгчээ. Түүний ард 11 гоолтой “Аль-Хилаль” багийн сербидовтлогч А.Митрович бичигдэж буй.
- “Аль-Наср” багийн төлөө К.Роналду 44 удаа тоглохдоо 38 гоол оруулж, 11 гоолын дамжуулалт өгчээ. Тус багийн түүхэнд хамгийн олон гоол оруулсан тоглогчдын жагсаалтад тэрбээр тавдугаар байрт орж ирсэн. Эхний байрт 123 гоолтой Мохаммад Аль-Сахлауи ордог аж.
- Португал тоглогч 2023 онд 60-аас олон гоолд оролцож, эл амжилтыг сүүлийн таван жилд анх удаа, карьертаа 10 дахь удаагаа үзүүллээ. Тэрбээр 2010-2018 онд есөн улирал дараалан 60-аас олон гоолд оролцсон супер цувралын эзэн болж байв. 2013 онд 69 гоол оруулж, 15 гоолын дамжуулалт өгсөн нь энэ хугацаан дахь шилдэг үзүүлэлт нь юм.
- “Аваргуудын лиг”-ийн хасагдах шатанд тоглох эрхээ “Аль-Наср” баг аваад байна. Тус тэмцээнд К.Роналду гурван гоол оруулжээ.
- Тус баг сүүлийн 20 тоглолтдоо ялагдалгүй, 18 ялж, хоёр тэнцээд байна.
- “Аль-Наср” баг лигтээ дэд байрт, “Аль-Хилаль” багаас гурван оноогоор хоцорч явна. Лигийг тэргүүлэгч хоёр багийн тулаан ирэх сарын 1-нд болно.
Бэлтгэсэн: Э.Манлайбаатар
