Дархан-Уул аймгийн Санхүүгийн хяналт, аудитын албаны улсын ахлах байцаагчийн актаар 1.6 сая төгрөгийг сургуулийн захирал Н.Саруулаар төлүүлэхээр тогтоосон байна. Н.Саруул уг шийдвэрийг эс зөвшөөрч шүүхэд хандаж, “ Захиргааны байгууллага албан тушаалтанд холбоотой хуулийн заалтыг баримталж сургуулийн захирал хүнд акт тогтоож байгаа нь үндэслэлгүй, хуульд заасан хохирол нөхөн төлөх субъект биш” гэх агуулгаар шүүхэд маргажээ.
Хэрэгт авагдсан баримтаар, Дархан-Уул аймгийн Дархан сумын 4 дүгээр сургуулийн захирлын тушаалаар багш Д.Галыг ажлаас халах шийдвэр гаргасан нь маргаан үүсэж, захиргааны хэргийн гурван шатны шүүхээр хянагдаж, шүүхээс сургуулийн захирлын тушаалыг хүчингүй болгож, Д.Галд ажилгүй байсан хугацааны олговорт 1.6 сая төгрөгийг нөхөн олгуулахаар шүүхээс шийдвэрлэсэн байна.
Захиргааны ерөнхий хуульд зааснаар захиргааны буруу шийдвэрийн улмаас иргэн, хуулийн этгээдийн хохирлыг төрөөс барагдуулан бол өөрт учирсан хохирлыг захиргааны байгууллага гэм буруутай албан тушаалтнаар буцааж төлүүлэхээр заасан, энэ үүргийг тухайн захиргааны байгууллагын дээд шатны байгууллагын дотоод аудитын нэгжид хариуцуулжээ.
Шүүх маргааныг хянан хэлэлцээд нэхэмжлэгч Н.Саруулын нэхэмжлэлийн шаардлагыг хэрэгсэхгүй болгов. Сургуулийн өмнөх болон бага, дунд боловсрол эзэмшүүлэх сургалтын байгууллагын “захирал”-ын албан тушаал нь төрийн үйлчилгээний удирдах албан тушаалд хамаарч байх тул Захиргааны ерөнхий хуульд заасан захиргааны албан тушаалтан гэж үзнэ, энэ үндэслэлээр уг хохирлыг нөхөн төлөх этгээд нь хууль бус тушаал гаргасан албан тушаалтан буюу энэ тохиолдолд Саруул мөн гэж шүүхээс дүгнэж, аудитын улсын ахлах байцаагчийн актыг хэвээр үлдээж шийдвэрлэжээ.
Бэлтгэсэн Б.Мөнхсайхан
