Авлигатай тэмцэх газрын Урьдчилан сэргийлэх, соён гэгээрүүлэх хэлтэс нь 2022 оны аравдугаар сарын 31-нээс арваннэгдүгээр сарын 4-ний өдрүүдэд авлигаас урьдчилан сэргийлэх чиг үүргийн хүрээнд Хөдөлмөрийн аюулгүй байдал, эрүүл мэндийн төвд ажиллаж, удирдлагаас нь баталсан тушаал шийдвэр, төсөв, санхүү, худалдан авах ажиллагааны баримт бичгийг судлав. Байгаль орчин, аялал жуулчлалын яаманд ажиллаж, байгалийн нөөц ашигласны төлбөрийн тухай хууль, журмын хэрэгжилт, яамнаас бодлогын хэмжээнд хэрэгжүүлж буй ажил, арга хэмжээтэй танилцаж, Авлигын эрсдэлийн үнэлгээний талаарах зөвлөмж, мөрдөгчийн мэдэгдэл, зөрчил арилгуулах албан бичгийн мөрөөр авч хэрэгжүүлсэн арга хэмжээнд дүн шинжилгээ хийв.
Авлигын эсрэг олон нийтийг соён гэгээрүүлэх, хууль тогтоомжийг таниулан сурталчлах дөрвөн удаагийн сургалтыг зохион байгуулж, нийт 1223 иргэн, албан тушаалтныг хамруулжээ. Авлигын эсрэг олон улсын өдрийг угтан Мал эмнэлгийн ерөнхий газартай хамтран “Мал, амьтны гаралтай түүхий эд, бүтээгдэхүүнийг экспортлоход тулгарч буй асуудал, цахимжуулалт, гарц шийдэл” сэдэвт хэлэлцүүлгийг 2022 оны 11 дүгээр сарын дөрөвний өдөр зохион байгуулав. Хэлэлцүүлэгт мал, амьтны гаралтай түүхий эд, бүтээгдэхүүн экспортолдог 60 аж ахуйн нэгжийн төлөөлөл оролцов. Тус хэлэлцүүлэгт төрийн байгууллагын давхардсан үйлчилгээг цахимжуулан хүнд суртал, шат дамжлагыг бууруулж, экспортыг нэмэгдүүлэх талаар хэлэлцүүлэг өрнүүлж, зөвлөмжид тусгах саналыг нэгтгэн дүгнэв.
Бэлтгэсэн Б.Мөнхсайхан
