Муай-тай бокс, кикбоксын мэргэжлийн тамирчдын халз шоу тулааныг “Fight media group”, “Undefeated Mma” холбоо хамтран энэ сарын 21-нд зохион байгуулах нь. Энэхүү шоуны оргил тулаан муай-тай боксын улсын аварга Ө.Төрбаяр, Японы тамирчин Риояа Инай нарын хооронд болно. Тэд Азийн аваргын бүсний төлөө өрсөлдөх юм. Шоуны дэд оргил тулаан нь манай улсын тамирчин Н.Цацрал, Н.Батцэнгэл нарын хооронд болох аж. Тэд холимог тулааны төрөлд нударга зөрүүлнэ. Эдгээрээс гадна мэргэжлийн бусад тамирчны олон тулаан, шоу болно гэдгийг зохион байгуулагчид онцлов. Ташрамд дуулгахад, холимог тулааны залуучууд (18-20 насныхан), насанд хүрэгчдийн Ази тивийн сонирхогчдын аварга шалгаруулах тэмцээн энэ сарын 27-30-нд Тажикистаны Душанбе хотод болно. Тус тэмцээнд холимог тулааны төрлөөр ямар нэгэн албан ёсны тулаан хийгээгүй тамирчид оролцох боломжтой. Тэмцээнийг Олон улсын холимог тулааны холбооны дүрэм, жингийн ангиллаар явуулах аж.
