ОХУ-ын уран гулгалтын багийн 15 настай тамирчин Камила Валиева допингийн асуудалд нэр холбогдоод буй. Иймд даваа гарагт болсон уран гулгалтын багийн тэмцээнд медаль хүртсэн тамирчдад шагнал гардуулах ёслолыг Мягмарт зохион байгуулах байсан ч Олон улсын олимпын хорооноос хууль эрх зүйн нөхцөл байдлын улмаас тодорхойгүй хугацаагаар хойшлуулсан билээ.
Шагнал гардуулах ёслолыг хойшлуулах шалтгааны талаар Олон улсын олимпын хорооноос тодорхой тайлбар хийгээгүй. Тэгвэл Inside the Games сайтад ёслолын ажиллагаа хойшлогдсон шалтгаан нь орос тамирчдын допингийн шинжилгээний хариутай холбоотой байж магадгүй гэж мэдээллээ. Түүнчлэн эх сурвалжийн мэдээлж буйгаар Оросын багийн тамирчны олимпын өмнө өгсөн допингийн шинжилгээ эерэг гэв.
Inside the Games сайтад бичсэнээр "асуудалтай" байгаа тамирчин нь энэ удаагийн олимпын шинэхэн од гэгдэж буй 15 настай Камила Валиева хэмээн мэдээлээд WADA-ийн дүрэм ёсоор 16 нас хүрээгүй тамирчны нэрийг зарлах ёсгүй, зөрчил гаргасан эсэхийг албан ёсоор тодорхойлох боломжгүй байгаа нь нөхцөл байдлыг улам маргаантай болгоод байна гэжээ.
Ийнхүү Бээжингийн өвлийн олимпын наадмын допингтой холбоотой анхны шуугиан дэгдлээ. ОХУ-ын Ерөнхийлөгчийн хэвлэлийн нарийн бичгийн дарга Дмитрий Песков үүсээд буй нөхцөл байдлын талаар Олон улсын олимпын хорооноос албан ёсны мэдэгдэл гарах хүртэл ямар ч таамаг гаргахгүй хүлээхийг санал болгов.
