Оймсноос нь боодол ам.доллар гарч ирсэн Н.Баярсайхны хэргийг 2019 онд Чингэлтэй дүүргийг Анхан шатны шүүх хэлэлцэж 40 сая төгрөгөөр торгох шийтгэл оноосон. Үүний дараа Нийслэлийн давж заалдах шүүхээр хэлэлцэх гэтэл хөөн хэлэлцэх хугацаа нь дууссан байв. Эл шийдвэрт прокуророос "Эсэргүүцлийн бичиг" гарган түүний хэргийг дахин шалгасан юм.
АТГ-ын мөрдөгчид "Оймсны" гэгдэх хэргийг шалгах явцад хураан авсан 639.2 сая төгрөгийг төрийн сангийн дансанд төвлөрүүлж, улсын орлого болголоо. Тодруулбал, МХЕГ-ын Экспорт, импорт, хилийн хорио цээрийн хяналтын хэлтсийн дарга асан Н.Баярсайханы хэрэг мөрдөн шалгах ажиллагааны үед эд мөрийн баримтаар орон сууцанд нэгжлэг хийхэд зочны өрөөнөөс 5.1 сая төгрөг, 16.460 ам.доллар, унтлагын өрөөнөөс 17.5 сая төгрөг, сейфнээс 140 сая төгрөг, 127.117 ам.доллар, 50 мянган юань, мөн түүний ажлын өрөөнөөс 10.8 сая төгрөг, 8600 ам.доллар тус тус хураан авсан нь нийт 230.8 сая төгрөг, 152.177 ам.доллар, 70 мянган юань болсон бөгөөд дээрх мөнгө, валютыг гэмт хэрэг үйлдэж олсон хөрөнгө, орлого гэж үзэх үндэслэлтэй тул улсын төсөвт шилжүүлэхээр шүүхээс шийдвэрлэсэн юм. Иймээс битүүмжлэгдэн хадгалж байсан нийт 639,244,450 төгрөгийг АТГ-ын мөрдөгчид Сангийн яамны төрийн сангийн дансанд тушаажээ.
