Канадад болж буй хоккейн Дэлхийн цомын тэмцээний шувтаргын тулааны эхний тоглолт өнөөдөр болно. Аваргын төлөө зохион байгуулагч Канадын баг, ихэвчлэн герман, словак, швейцарь, дани, норвеги, австри, франц тоглогчдоос бүрдсэн Европын шигшээтэй тоглоно.
Шигшээ тоглолт есдүгээр сарын 27, 29, аравдугаар сарын 1-ний өдрүүдэд явагдах бөгөөд аваргын төлөө шалгарч үлдсэн хоёр багийн түрүүлж хоёр хожсон нь ялагч болох билээ.
Тэмцээний хагас шигшээд Канад ОХУ-ыг 5:3-аар, Европын шигшээ Шведийг нэмэлт цагт 3:2-оор тус тус хожсон юм.
