Зэвсэгт хүчний 016 дугаар нэгтгэл болон Зэвсэгт хүчний 014, 336 дугаар ангиуд уламжлал болон тогтсон “Дайчдын төрсөн өдөр” арга хэмжээг зохион байгуулжээ.
Энэ нь тухайн сард төрсөн хугацаат цэргийн алба хаагчдынхаа төрсөн өдрийг хамтатган тэмдэглэж, анги хамт олноосоо баяр хүргэж, дуу хуур, амтат зоогоор бэлэг барьдаг уламжлалт ажил юм. Энэ хүрээнд тус нэгтгэл, ангиуд 10, 11 дүгээр сард төрсөн хугацаат цэргийн алба хаагчдынхаа төрсөн өдрийг тус бүртээ тэмдэглэсэн бөгөөд дайчид мартагдашгүй дурсамж бүтээж, хүндэтгэл үзүүлсэнд талархал илэрхийлж байсан юм.
Төрсөн өдрийн эздийг авьяаслаг алба хаагчид болон түрүүч, байлдагч нарын урлагийн тоглолт, цэргийн гал тогооныхны бэлтгэсэн амтат зоог, онжавууд найз нөхдийнх нь сэтгэлийн бэлгүүд угтахын зэрэгцээ ангийн удирдлагуудаас ч урам зориг хайрлаж, баяр хүргэдэг билээ.
