ЕБС-ийн сурагчдад танхимаар давтлага өгөх хугацааг 2021 оны нэгдүгээр сарын 1-н хүртэл хойшлуулах болсон талаар Монгол Улсын Шадар сайд Я.Содбаатар мэдээллээ.
Тэрбээр "Өндөржүүлсэн бэлэн байдлын зэрэгт буусан, халдварын голомт бүртгэгдээгүй 18 аймаг бий. Эдгээрт оршин сууж буй эцэг, эхчүүд теле хичээл орсноор хоцрогдол үүсэж байгаа тул танхимаар давтлага өгөх тухай хүсэлт гаргасныг боловсролын газрууд нь уламжилсан. Эцэг, эхчүүдийн сайн дурын хүсэлтийг үндэслэн танхимаар давтлага өгч, хоцрогдлыг арилгах тухай байсан. Эдгээр аймагт танхимд цуглах хүний тоог хязгаарлаагүй байсан ч Монгол Улс даяар ерөнхий боловсролын сургуулиудад давтлага өгөхийг 2021 оны нэгдүгээр сарын 1-н болтол хойшлуулсан" гэв.
Эргэн сануулахад, Боловсрол, шинжлэх ухааны сайдын тушаалаар өндөржүүлсэн бэлэн байдалд шилжсэн аймгуудад 2020 оны арванхоёрдугаар сарын 15-наас эхлэн танхимын давтлага өгөхийг зөвшөөрсөн тухай өчигдөр БШУЯ-аас мэдээлсэн.
