Малайзын аялал жуулчлалын бүс нутаг Лангкави аралд мэргэжлийн дугуйчдын олон өдрийн “Tour de Langkawi 2022” уралдаан зохион байгуулсан. Дэлхийн шилдгүүд өрсөлдсөн, А зэрэглэлийн уг уралдаан найм хоног үргэлжилж, уржигдар өндөрлөлөө. Манай улсаас үндэсний шигшээ баг, “Алдар” спорт хорооны тамирчин, ОУХМ С.Жамбалжамц уг уралдаанд оролцож буй талаар бид өмнө нь мэдээлсэн. Тэрбээр 35 орны 117 дугуйчинтай өрсөлдсөн бөгөөд 1100 км замыг 25:56:32 цагт туулсан амжилтаар IX байр эзэлжээ. Ингэхдээ Ази тивийн шилдэг дугуйчнаар шалгарсан байна. Үүнээс гадна уулын шилдэг дугуйчдаас II байрт шалгарсан амжилтаар чансаагаа ахиулж, дэлхийн шилдэг 10-т жагсжээ.
