Тажикистаны Душанбе хотод “Billie Jean king cup 2022” талбайн теннисний эмэгтэйчүүдийн насанд хүрэгчдийн багийн аварга шалгаруулах олон улсын тэмцээн үргэлжилж байна. Уг тэмцээнд Монголын шигшээ багийн тамирчид дасгалжуулагч Ан Жэ Хёны удирдлагад оролцож буй юм. Манай тамирчид тус тэмцээний II группийн B хэсэгт Пакистан, Туркменистан, эзэн орны шигшээтэй тоглохоор учраа таарсан. Эхний тоглолтод тэд Пакистаны тамирчдыг 3:0-ээр хожжээ. Ганцаарчилсан тоглолтод Ч.Марта өрсөлдөгчөө 6:0, 6:3, Ч.Маралгоо 6:2, 6:0-ээр илүүрхсэн байна. Хос тоглолтын төрөлд А.Жаргал, Ч.Маралгоо нар 6:3, 5:7, 6:1 оноогоор хожжээ. Хоёр дахь тоглолтод манайхан Туркменистаны шигшээ багийнхантай өрсөлдөх нь. Дээрх тэмцээнийг хоёр жилийн өмнө Шинэ Зеландад зохион байгуулахад манай эмэгтэй теннисчид анх удаа өрсөлдөж байв.
