Тэнгис кино театрт энэ сарын 11-нд нээлтээ хийх кино уран бүтээлүүдийг онцолж байна. Дараах кинонууд Валентины баяр хүртэл тус кино театрт тавигдах юм байна.
“For you” уран сайхны кино
Улс орон даяар 3-н хоног амрахаар болно. Санамсаргүй байдлаар дүргүй залуутайгаа хамт түгжигдсэн маркетингийн менежер бүсгүй гарах арга хайх боловч ээлж солигдтол өөр арга байхгүй гэдгийг хамгаалагч Маргад ойлгуулна. Их дэлгүүрт түгжигдсэн залуус эхэндээ зөрчилдөх ба яваандаа цагийг хөгжилтэй өнгөрөөх гэж Их дэлгүүрээр хэсэж энэ хугацаандаа бие биедээ дасаж дурлана. Энэхүү кино тун удахгүй Тэнгис кино театрт хоёрдугаар сарын 11-14-ны хүртэл гарах юм байна. Гол дүрүүдэд жүжигчин О.Самданпүрэв, Ц.Номин, Р.Отгонбаяр, А.Бямбабаяр, Р.Сүхболд, Г.Жанчив нар тогложээ.
“Marry me” уран сайхны кино
Супер од Кэт Валдез, Бастиан нар фэнүүдийнхээ өмнө гэрлэхээр болдог. Гэвч Кэт гэрлэлтийн тангараг өргөхөөсөө хэдхэн секундын өмнө Бастианыг урвасныг мэдэх болно. Ингээд оронд нь үл таних эрхэм Чарлитай гэрлэхээр шийддэг. Инээдмийн адал явдалт тус кино нь мөн энэ сарын 11-14-ны хооронд Тэнгис кино театрт гарах юм байна. Жон Брэдли, Оуэн Вилсон, Женнифер Лопез нар гол дүрүүдэд тогложээ.
“Сургуулийн сүнс” уран сайхны кино
Хэрвээ та валентинаар аймшгийн кино үзэхийг хүсвэл энэ киног сонирхоорой. Сургууль дээрээ тодорхой шалтгаанаар хоноглох болсон 5 сурагч хараалтай ангийн үүдийг нээснээр тэдэнд учир битүүлэг элдэв зүйлс үзэгдэж, сонсогдож, мэдрэгдэж, ар араасаа адармаатай үйл явдлууд хөвөрсөөр эцэст нь бүхний зангилааг тайлсан ч...аймшигт явдал үүгээр дуусаагүй гэдэг нь тодорхой болно. Тэд энэ шөнийг давж гарч чадах болов уу?
“Этгээд” уран сайхны кино
Эрхэмээ, Сэлэнгэ нар хотоос зайдуу, ой модон дундах хуучны нэгэн байшинд нүүн ирснээр үйл явдал эхэлнэ. Уран бүтээлч эхнэртээ орон зай бий болгож, амар тайван байдлыг нь бодож энд ирсэн гэх Эрхэмээгийн байгаа байдал, үйлдэл нь тэдний шинэхэн хөршид хачирхалтай санагдана. Өдөр тутамд бий болох шинэ, ЭТГЭЭД нөхцөл байдлуудын учир шалтгаан нь чухам юу байв? Бүхнийг анхнаас нь зураглаж суусан ЭТГЭЭД нь хэн байв?
