Швед улсын Скелефтеа хотод энэ сарын 21-23-нд өвлийн усанд сэлэлтийн “Дэлхийн цом”-ын аварга шалгаруулах тэмцээн боллоо. Үүнд оролцсон Монголын тамирчид ОБЕГ-ын харьяа “Аврагч” биеийн тамир, техник спортын хороо, Баянгол дүүргийн Усан спорт сургалтын төвийн дасгалжуулагч Ш.Даваадоржийн удирдлагад 21 улсын 600 гаруй тамирчинтэй өрсөлдөв. Тэднээс түүний зээ охин, Усан спорт сургалтын төвийн тамирчин, 12 настай М.Цэнгүүн өврөөр даллах, мэлхий сэлэлт, далайн гахай төрөлд 25, 50 метрийн зайнд тус бүр түрүүлж, алтан медаль хүртлээ. Тэгвэл тус төвийн тамирчин, шавь,15 настай С.Мөнх-Оргил өврөөр, араар даллах, мэлхий сэлэлт, далайн гахай төрөлд 25, 50 метрийн зайнд мөн тус бүр тэргүүлэн аварга болсон юм. Мастеруудын ангилалд өрсөлдсөн Ш.Даваадорж гурван төрөлд хүрэл медаль гардав. Манайхан Итали улсын Молвено хотод өнгөрсөн жилийн нэгдүгээр сард болсон ДАШТ-д 48 улсын 752 тамирчинтай ур чадвараа сорьсноос С.Мөнх-Оргил, М.Цэнгүүн нар мэлхий сэлэлтийн 50 метрийн зайд хүрэл медаль зүүсэн билээ. Түүнчлэн Эстони улсын Таллин хотод тэр жилийн гуравдугаар сард болсон ДАШТ-д Ш.Даваадорж мэлхий сэлэлтийн 50 метрийн зайд алт, С.Мөнх-Оргил мөнгөн медальтай ирж байв.
