Өсвөр үеийнхний шатрын улсын аварга шалгаруулах хөвгүүдийн 56, охидын 50 дахь удаагийн шигшээ тэмцээний 7-8, 9-10, 11-12, 13-14, 15-16, 17-18 насны ангилалд нийслэлийн 378, 21 аймгийн 882, нийт 1260 тоглогч оролцохоор шалгарсан билээ. Найм хүртэлх насны ангилалд охидоос Б.Буянхишиг (Говь-Алтай), хөвгүүдээс Б.Цэлмэг (“Гэгээн арвай” клуб), 10 хүртэл насныхад Ч.Нандинжигүүр (“Стейниц”), Б.Энхмандал (“Босоо ноён”), 12 хүртэл насныхад И.Цэлмүүн, Ц.Ананд (“Босоо ноён”) нар түрүүлэв. 14 хүртэлх насныхад Б.Буянхишиг (“Стейниц”), Б.Цолмон (Сэлэнгэ аймаг) улсын аварга боллоо. Тэгвэл 16 хүртэлх насныхад Э.Одмаа (“Босоо ноён” ), У.Содбилэг (“ChesStation”), 18 хүртэлх насныхад Э.Энхрий (“Стейниц”), Х.Өлзийхишиг (“ABChess” шатрын академи) тэргүүллээ. Дээрх тэмцээний эхний гурван байрт шалгарсан тоглогчид Олон улсын шатрын холбооноос “Дэлхийн цом”-ын тэмцээнд оролцох эрхтэй боллоо.
Сонирхуулахад, шатар и-спортод нэгдсэн. Үүнтэй холбоотойгоор дэлхийн шилдгүүд энэ сарын 16-21-нд chess.com платформд цахимаар зохион байгуулж буй “Дэлхийн цом”-д аваргын төлөө хөлөг дээр “тулалдаж” байна. Урьдчилсан шатны сонгон шалгаруулах тэмцээнд “ABChess” шатрын академиас их мастер Д.Батсүрэн, С.Билгүүн нар оролцож байна. Тэд дараагийн шатанд шалгарвал “The MongolZ” багийг төлөөлж, и-спортод шатрын төрлөөр өрсөлдөх юм.
