СӨҮЛ /Yonhap/. “Netflix”-д хамгийн өндөр хандалт авсан “Squad game” киноны хоёрдугаар цуврал гарах болсныг тус киноны найруулагч Хван Дун Хюк өнгөрсөн мягмар гарагт Лос Анжелес хотод болсон нэгэн арга хэмжээний үеэр “Associated Press”-д ярилцлага өгөхдөө дурьджээ.
Тэр хэлэхдээ, “Хоёрдугаар цувралыг үзэхийг хүсэж буй маш олон хүн байгаа учраас бидэнд ямар ч сонголт үлдээгүй бололтой. Хоёрдугаар цуврал удахгүй гарна” гэжээ.
Өмнө нь тус киноны найруулагч хоёрдугаар цуврал гарна гэдгийг сэтгүүлчдэд дуулгасан ч хэзээ гарах, ямар үйл явдал өрнөхийг хэлээгүй аж. Гэхдээ Ги Хун эргэн ирнэ, энэ дэлхийн төлөө ямар нэгэн зүйл хийх болно гэсэн байна.
Солонгос хэлээрх, триллер жанрын энэхүү цувралд 45.6 тэрбум вон /38.5 сая ам.доллар/ хожихын төлөө хүүхдүүдийн тоглоомоор өөр хоорондоо амь тэмцэн өрсөлдөж буй хүмүүсийн талаар өгүүлдэг. Есөн ангитай “Squid Game”-ийг есдүгээр сард үзэгчдийн хүртээл болсноос дөрөвхөн долоо хоногийн дотор 140 сая гаруй өрх үзсэн бөгөөд “Netflix”-ийн хамгийн өндөр амжилт үзүүлсэн цуврал болсон юм.
