Дэлхийн хошой аварга, олимпийн хошой хүрэл медальт, олимпоос медаль авсан Монголын анхны эмэгтэй тамирчин, гавьяат тамирчин Доржсүрэнгийн Мөнхбаяр зодог тайлж буйгаа албан ёсоор зарлалаа.
Тэрбээр Дэлхийн цомын олон удаагийн аварга, буудлагын спортын бvхий л тэмцээнээс медаль хvртэж явсан, Ази болон Европын аварга шалгаруулах тэмцээний олон удаагийн аварга тамирчин.
Д.Мөнхбаяр гавьяат 2000 оны Сиднейн олимпод оролцсоныхоо дараа иргэншлээ сольж, Герман улсын иргэн болсон юм.
Д.Мөнхбаярын томоохон амжилт:
Олимп:
-1992 оны Барселоны олимпод 25 метрийн спорт гар бууны дасгалд оролцон хүрэл медаль хүртэж, олимпийн медальт Монголын анхны эмэгтэй тамирчин болсон.
-2008 оны Бээжингийн олимпод Германы улсын нэрийн өмнөөс 25 метрийн спорт гар бууны дасгалд цэц сорьж, олимпийн хошой хүрэл медалтан болсон.
Түүний эл медаль Герман улсын буудлагын спортын түүхэн дэх олимпийн анхны медаль байлаа. Эл олимпийн медалийн тавцанд Монголын хоёр мэргэн бууч болох О.Гүндэгмаа, Д.Мөнхбаяр нар хамт зогсож, монгол түмнээ баярлуулсан билээ.
ДАШТ:
-1998 онд Испани улсын Барселона хотод болсон ДАШТ-д Монгол Улсын нэрийн өмнөөс оролцон, 10 метрийн хийн гар бууны дасгалд ганцаарчилсан төрөлд аваргалж, багаараа хүрэл медаль авсан.
-2002 оны ДАШТ-д Герман улсын нэрийн өмнөөс оролцон 25 метрийн спорт гар бууны дасгалд түрүүлж, дэлхийн хошой аварга болсон.
