Зэвсэгт хүчний Хуурай замын цэргийн командлагч бригадын генерал Ч.Цогтжаргал Жанжин Д.Сүхбаатарын нэрэмжит Байлдааны гавьяаны улаан тугийн одонт Зэвсэгт хүчний 336 дугаар ангид энэ сарын 23, 24-ны өдөр ажиллалаа. Энэ үеэр ангийн нийт бие бүрэлдэхүүнтэй уулзаж, тэдний санал сэтгэгдэл, тулгамдаж байгаа зарим асуудлын талаар харилцан ярилцаж, тодорхой үүрэг чиглэлийг өгсөн юм.
Тэрээр уулзалтын эхэнд “Их говийн гарнизон буюу “Хээрийн академи”-д алба хааж, ажил амьдралаараа холбогдсон та бүхэнд чин сэтгэлийн талархал илэрхийлье. Миний хувьд Зүүнбаянд ажиллаж, амьдарч явсан учир та бүхэн сэтгэлд их дотно байдаг. Өвөлжилтийн бэлтгэл ажлыг хангах үүднээс засвар тохижилт, бүтээн байгуулалтын ажил нэлээдгүй хийгдсэн байна. Мөн “Эко ногоон хотхон” төслийн хүрээнд ангийн байрлалд олон зуун мод, зүлэг тарьж ургуулах, арчлах амаргүй байсан нь ойлгомжтой ч үр дүн гарсан байна.
Хугацаат цэргийн “Сургалтын төв”-ийн үйл ажиллагаатай танилцлаа. Нэлээдгүй бэлдсэн нь цэргийн амрах байр, тав тухтай орчин нөхцөлөөс нь харагдаж байна. Цаашид улам сайжруулах, хувийн орон зайг хангалттай гаргаж өгөх, чөлөөт цагаар уран зохиол болон төрөл бүрийн ном уншуулах тал дээр санаачилгатай ажиллах хэрэгтэй. Ангийн хувьд барилга байгууламжийн хүрэлцээ хангалттай болсон ч заримд нь урсгал болон их засвар хийх шаардлагатай байна. Аливаа засвар тохижилтын ажил мөнгө санхүүтэй холбоотой учир сайтар төлөвлөж, шат дараатайгаар засварыг хэрэгжүүлэх нь зүйтэй. Байнгын бие бүрэлдэхүүний хувьд сэтгэлгээ хандлагаа өөрчил, хайран цагийг урсгалаараа битгий өнгөрөө, хэв маягт баригдахгүй чөлөөтэй сэтгэ, эхэлсэн ажилдаа тууштай бай, хувь хүний хөгжлийн асуудлыг чухалчлах ёстой. Эцэст нь халуунд халж, хүйтэнд даарч хоёргүй сэтгэлээр анги, байгууллага, Зэвсэгт хүчний үйл хэрэгт өөрийн хүч, хөдөлмөрөө зориулан яваа та бүхэнд ажлын өндөр амжилт, амьдралын сайн сайхан бүхнийг хүсэн ерөөе” гэлээ.
Ахмад А.Алтанхуяг
