Гадаад харилцааны сайд Б.Батцэцэг Бүгд Найрамдах Чех Улсаас Монгол Улсад суугаа Элчин сайд Ийржи Бродскийг нутаг бүрмөсөн буцахтай нь холбогдуулан хүлээн авч уулзав. Мөн энэ өдөр НҮБ-ын Хүүхдийн сангийн суурин төлөөлөгч Эварист Куасси-Комлан Гадаад харилцааны сайдад итгэмжлэх захидлаа гардуулж, үүрэгт ажилдаа албан ёсоор оров. Эварист Куасси-Комлан нь Того улсын иргэн бөгөөд цэвэр ус, ариун цэвэр, эрүүл ахуйн асуудлаар мэргэшсэн, манай улсад томилогдохын өмнө Тайландын Бангкок хот дахь НҮБ-ын Хүүхдийн сангийн Зүүн Ази, Номхон далайн бүс нутгийн төвийн даргаар ажиллаж байжээ.
Мөн Норвегийн Хаант Улсад хавсран суух Онц бөгөөд Бүрэн эрхт Элчин сайд Т.Жанабазар тус улсын Цог жавхлант хаан V Харалдад итгэмжлэх жуух бичгээ өргөн барьжээ. Үүнээс гадна ОХУ-д суух Элчин сайд Ө.Энхтүвшин тус улсын Гадаад хэргийн орлогч сайд И.В.Моргуловт итгэмжлэх жуух бичгийнхээ хувийг гардуулсан байна.
Бэлтгэсэн У.Наран
