БНСУ-ын иргэдийг визгүй зорчуулах шийдвэрийг нэг жилээр сунгалаа

Манай оронд жуулчлах зорилгоор 90 хүр­тэлх хоногийн хугацаанд зорчих Өмнөд Солон­госын иргэдийг визийн шаардлагаас чөлөө­лөх шийдвэрийг дахин нэг жилээр сунгасныг Монгол дахь тус улсын ЭСЯ-наас мэдээлэв. Зас­гийн газар цар тахлын дараах хямралыг даван туулах, аялал жуулчлалыг сэргээх зорил­гоор 2022 оны тавдугаар сард ийм шийдвэр гар­­гасан бөгөөд хүчинтэй хугацааг нь 2024 оны арван­хоёрдугаар сарын 31 хүртэл гэж тог­тоо­сон юм. Тэгвэл солонгос жуулчид дахин нэг жил буюу энэ он дуустал манай улсад визгүй зор­чих нь. 
Монгол дахь БНСУ-ын ЭСЯ-ны цахим хууд­санд энэ талаар “Монголын Засгийн газар со­лонгос иргэдийг хилээр визгүй, аюулгүй нэвт­рүүлэх зөвшөөрлийг сунгалаа. Тиймээс манай орны иргэд аялал жуулчлалын зорилгоор 90 хүртэлх хоногийн хугацаанд Монголд зорчих хүсэлтэй бол өмнөхийн адил визгүйгээр, ямар нэгэн тусгай шаардлага, баримт бичиггүй хилээр нэвтрэх боломжтой. Харин жуулчлалаас өөр зорилгоор тус улсыг зорих бол үүндээ тохирсон виз зайлшгүй авах ёстой. Энэ шийдвэр нь Бүгд найрамдах Солонгос, Бүгд найрамдах Хятад улс хоорондын харилцааг өргөжүүлж, хоёр орны иргэдийн харилцан ойлголцол, нөхөрлөлийг гүнзгийрүүлэхэд ч ач холбогдолтой” гэжээ. 
Засгийн газар ийм шийдвэр гаргаснаа ма­най улсын аялал жуулчлалын мэргэжлийн хол­­боод, тур операторуудад албан ёсоор урьд­чилж мэдэгдээгүй аж. Салбарын холбогдох бай­гууллагынхан, бизнес эрхлэгчид БНСУ-ын ЭСЯ-ны мэдээллээс л үүнийг олж мэджээ. Хэрэв ал­бан ёсоор урьдчилан мэдэгдэж, зарласан бол Өмнөд Солонгосоос жуулчин хүлээж ав­даг ком­паниуд энэ оны аяллын хөтөлбөр, тө­лөв­лө­гөөгөө эрт гаргаж, бэлтгэлээ базаах байсныг бизнес эрхлэгчдийн төлөөллүүд хэлэв.

Ж.Сувд