Францын нийслэл Парис хотод чөлөөт, сонгомол бөхийн ДАШТ өнөөдөр хаалтаа хийнэ. Энэ өдөр эрэгтэйчүүдийн 65, 70, 74, 97 кг жинд аваргууд тодрох юм. Эрэгтэйчүүдийн 65 кг-д Нармандахын Лхамгармаа, 70 кг-д Ганзоригийн Мандахнаран, 74-т Доржванчигийн Гомбодорж, 97-д Ө.Батзул нар хүч үзнэ.
65 кг: Н.Лхамгармаа
Энэ онд улсынхаа аваргад анх удаа түрүүлсэн Н.Лхамгармаа эхний тойрогт Азербайжаны Аганусейн Мустафаевтай барилдана. Энэ жинд Лондоны олимпын аварга, Риогийн мөнгөн медальт Азербайжаны бөх Тогрул Асгаров допингийн шинжилгээнд бүдэрсэн тул нэг жил тэмцээнд оролцох эрхээ хасуулсан билээ. Түүний оронд нутгаасаа дэлхийд өрсөлдөхөөр А.Мустафаев сонгогдсон юм.
Өнгөрсөн жил тивийнхээ аваргад шагналт тавдугаар байр эзэлсэн бөх. Түүнийг ялвал дараагийн тойрогт Болгарын Николай Куртев, Беларусийн Азамат Нурикаугийн ялсантай нь хүч үзнэ. Тус жингийн ихэнх шилдгүүд дээд жиндээ өрсөлдөхөөр болсон юм. Энэ жинд Риогийн олимпын аварга орос эр Сослан Рамоновын оронд 2010 онд ДАШТ-ээс мөнгөн медаль хүртсэн Алан Гогаев зодоглох аж.
70 кг: Г.Мандахнаран
Дэлхийн хошой хүрэл медальт Г.Мандахнаран гурав дахь медалиа авахын төлөө 70-д хүч сорино. Манай бөх эхний тойрогт Канадын бөх Майкл Асселстинтэй оноолт таарав. Түүнийг ялвал Азийн аварга Энэтхэгийн бөх Амит Кумар, Лондоны олимпын хүрэл медальт Казахстаны Азхурек Танатаровын ялсантай хүч үзнэ.
Уг жинд Риогийн олимпоос хүрэл медаль хүртэж, шагналын тавцан дээр хамтдаа зогссон Италийн Франк Чамисо, Узбекистаны бөх, Г.Мандахнаранг ялж, медаль зүүсэн Ихтиёр Наврузов нар эхний даваанд учраа таарчээ. Манай бөх хоёр ялж, энэ хоёрын ялсан нь учраагаа дийлвэл таарах боломжтой.
Хэрвээ гурав ялвал медалийн төлөө хоёр жилийн өмнө энэ жинд дэлхийн аварга болсон ОХУ-ын Магомедрасул Газимагомедовтой таарах магадлалтай.
74 кг: Д.Гомбодорж
Манай тамирчин эхний тойрогт Польшийн Андре Сокалскитай оноолт таарав. Түүнийг ялвал Испанийн Таймураз Фрьев, Тажикстаны Гамид Залиловын ялсантай барилдана. Манай бөх ялаад гарвал цаана нь Туркийн бөх Риогийн олимпын хүрэлтэй Соннер Демиртас хүлээж байж мэднэ. Турк эр эхний даваанд хийлж, улмаар Болгарын Светослав Димитров, Македонийн Евгэни Неделко нарын ялсантай таарна.
97 кг: Ө.Батзул
Эхний тойрогт гурван олимпод оролцсон Молдавын бөх Николае Кебантай, түүнийг ялж чадвал Японы Наояа Акагүматай учраа таарна. Хоёр ялвал энэ жинд сүүлийн хоёр жил босоо яваа АНУ-ын Кайл Снайдертай барилдах болов уу. Риогийн олимпын аварга америк эр эхний учраа болох Казахстаны Мамед Ибрагимовыг ялах даалгавартай.
